Iung pơma lơ̆m năr lêh, Đại tướng Trịnh Văn Quyết sơkơ̆t hơdăh, vei lăng năng tông sơđơ̆ng Teh đak jĭ tơdrong jang kơ pơđĭ kon pơlei kơ yuơ Đảng chĕp kơ̆l, lơ̆m ou khul Kong ang kon pơlei jĭ khul gĭt kăl hloh. ‘Meh vă vei lăng sơđơ̆ng đơ̆ng hrôih, đơ̆ng hơtăih ‘noh kăl vei kơjăp đơ̆ng blŭng a, mă “Blŭng a ‘noh jĭ jơhngơ̆m đon kon pơlei". Kơdră chĕp pơgơ̆r Ban Tuyên giáo Trung ương athei Gia Lai hơnơ̆ng tơlĕch jang kiơ̆ jơnei rim Tơdrong tơchơ̆t đơ̆ng Trung ương găh tơ iung pơjing tơpôl jang ‘lơ̆ng, sơđơ̆ng, gơh hơgei păng Trong jang kăl Vei lăng sơđơ̆ng Teh đak; tơplih ‘nao bơ̆ jang pơrô̆ pơrôp, pơm hơtŏk kĕ krơ̆ng tơ̆ hơnăp tơdrong kơtơ̆ng ang kơnê̆ lơm mạng; atŏk kơtang iung jang hơdoi ƀar păh Kŏng ang, Ƀô̆ đô̆i, Mặt trận Tổ quốc păng rim khul; tơ iung pơjing khul kŏng ang tơpă tơjê̆ kon pơlei, lăng kăl kon pơlei, hlôh vao kon pơlei, kơ yuơ kơ kon pơlei mă pơvih pơvăn.