Tơ̆ jơ sơng, Tổng Bí thư, Kơdră chĕp pơgơ̆r Teh đak Tô Lâm pơma hơdăh tơdrong jang hơdoi vei lăng sơđơ̆ng teh đak jĭ tơdrong jang kăl hloh, tơgop hơnhăk tơgoăt tơgoăl ƀar teh đak yak mơ̆t jrŭ hloh dơ̆ng, tơpă hloh dơ̆ng, tơgop lơ̆m rơngei hiôk hian păng atŏk tơ iung kơ tơring păng apŭng plĕnh teh. Tổng Bí thư, Kơdră chĕp pơgơ̆r teh đak Tô Lâm sơkơ̆t hơdăh, Việt Nam lăng Hoa Kỳ jĭ mĭnh lơ̆m dôm teh đak jang hpơdoi gĭt kăl hloh, hơpơi ‘meh vă atŭm hăm Hoa Kỳ hơnơ̆ng tơlĕch jơnei trong jang Hơdoi gĭt kăl tôm tong, hơnhăk tơgoăt tơgoăl ƀar teh đak atok tơ iung roi năr roi tơpă, lang să păng jơnei, kơ yuơ đei iŏk yoa ăn kon pơlei ƀar teh đak. Đô đốc Paparo drơ̆ng lăp hăm dôm nơ̆r athei hơdăh đơ̆ng Tổng Bí thư, Kơdră chĕp pơgơ̆r teh đak Tô Lâm găh rim trong atok kơtang tơgoăt tơgoăl ƀar teh đak tŏk kơtang ‘nao, adoi pơkăp, Khul kơdră chĕp pơgơ̆r khul lĭnh Thái Bình Dương gô hơnơ̆ng iung jang hơdoi kơjăp hăm Việt Nam vă tơlĕch jang jơnei rim tơdrong jang hơdoi ‘mêm mơnat, tơgŭm djru, dŏng tơgŭm sar bar, pơm hơtŏk jang kiơ̆ ‘lơ̆ng khôi luơ̆t tơ̆ đak dơsĭ.