Tơ̆ jơ pơma đam, Kơdră Kuô̆k hô̆i Trần Thanh Mẫn lui ngeh hăm tơdrong pơgơ̆r đơ̆ng Kơdră Kuô̆k hô̆i  Sophon Zaram,  Kuô̆k hô̆i Thái Lan gô pơtoi yak hơdoi hăm Jơnŭm pơgơ̆r teh đak vă jang hơtŏk mŭk drăm – tơpôl, hơtŏk tơdrong hơrih ăn kon pơlei păng hơnih dơ̆ng kơ teh đak Thái Lan lơ̆m kơpal teh. Bơnê kơ tơdrong jang hơdoi kơ 2 hơnih chih akŏm khôi luơ̆t kơ 2 teh đak lơ̆m khei năr ou ki, 2 Kơdră Kuô̆k hô̆i drơ̆ng nơ̆r pơtoi asong khŭl kơpal năm hơpeh hơpong dih băl; pơm jang đei jơnei Tơchơ̆t jang hơdoi đơ̆ng Kuô̆k hô̆i kơ 2 teh đak.

Pơma đam gah dôm tơdrong đei ƀôh lơ̆m tơring păng lơ̆m apŭng plenh teh, 2 Kơdră Kuô̆k hô̆i drơ̆ng nơ̆r pơtoi jang atŭm kơjăp lơ̆m ASEAN, AIPA, IPU păng dôm tơdrong hop akŏm lơ teh đak; iŏk yua sơnong jang tơm kơ ASEAN păng hơtŏk jang hơdoi lơ̆m tơchơ̆t jang kơ tơring Mê Công.