Lơ̆m jơ năr đơ̆ng năr 26/7 truh năr 3/8, Khul K52 hlôi ƀôh, kôch akŏm đei 3 kơl ƀô̆ đô̆i lôch dŏng teh đak; truh năr 4/8 hơnơ̆ng tơchă ƀôh dơ̆ng 3 kơ̆l, hơtŏk akŏp kơting ƀô̆ đô̆i lôch dŏng teh đak đei kôch akŏm lơm ‘măng iung jang ou truh 6 kơl. Lăp đơ̆ng rŏng ƀôh, kang ƀô̆, ƀô̆ đô̆i hơnih ou hlôi iung jang kôch iŏk kiơ̆ ƀlep tơdrong tơchơ̆t, sơđơ̆ng trŏ lăp; rim kơting ƀô̆ đô̆i đei chơ vih tơ̆ Hơnih Ƀô̆ đô̆i tơring Ia Boòng vă yôk, vei lăng păng pơm pơkeh hla bơar hô sơ.

Tơdrong jơnei ou gơnơm tơdrong iung jang hơdoi kơjăp đơ̆ng khul jang tơchă hăm khul kơdră chĕp pơgơ̆r đảng, kơdră chĕp pơgơ̆r tơring, hơnih bơ̆ jang ƀô̆ đô̆i tơring păng kon pơlei lơ̆m hơlen dôm tơdrong kơtơ̆ng ang ou to. Dang ei, Khul K52 hơnơ̆ng pơih să năm tơchă tơ̆ pơlei Sơr păng rim bro tơjê̆ đei kơtơ̆ng ang găh hơnih ƀŭ ƀô̆ đô̆i lôch dŏng teh đak.