Ƀât hlơ hlĕng tŏ ‘năr dai, tai ‘năr dơ̆ng, ƀok Y Ung Byă, tơ̆ plei Cuôr, xăh Ea M’Droh, dêh char Đắk Lắk oei hơngŭr hăt man hnam. 2 ‘nu thơ̆ lŭk hô, kăt pơsei, oei hơkăn ƀok ‘nŏh pơdŭ hô tuh ăn đe man. Hnam xă 72 m2 man vă jê̆ đang bơih. Ƀok Y Ung ăn tơbăt, hnam tơnuh đei 6 ‘nu bơngai, đunh kơ âu hơnơ̆ng hơpơi ‘mĕh đei hnam oei kơjăp ‘lơ̆ng. Dang ei, Chi ƀô̆ Công an xăh Ea M’Droh tơgŭm jên răt tơmam ming man, ƀok Y Ung iŏk dơ̆ng bơngai jang păng kơdih kâu sư man hnam mă sư hơnơ̆ng hơpơi ‘mĕh brei drou: “Đei hnam ‘nŏh hơiă dêh, vă adrin jang xa dơ̆ng, chă mơng jên kơtum kơtŏng ‘nhŏng oh vă man kĕh hnam ‘nâu. Đei hnam bơih vă adrin jang xa, rong ‘me kon hơ ‘lơ̆p năm hŏk truh tôch, adrin jang xa vă gơ̆h klăih đơ̆ng tơnuh hin”.

Kŭm tơ̆ plei Cuôr mơ̆n, unh hnam ƀok Y Đek Ênuôl 'nao tŏk oei tơ̆ hnam 'nao kơjăp 'lơ̆ng. Ƀok Y Đek ưh kĕ ôn jơhngâm đon chơt hơiă, yoa vă jê̆ 30 sơnăm âu ki, hnam sư arih xa lơ̆m hnam tơ̆r so sŏch, bơbŭng kem hiăh đĭ. Đơ̆ng khei 8 sơnăm sơ̆, unh hnam ƀok đei Chi ƀô̆ Dôm anih jang Đảng xăh Ea M'Droh yak hơdoi, hơnơ̆ng năm ngôi jet gia, pơma nuh. Ưh lăp tơgŭm mĭnh đôi rơmo yŏng đĕch, Chi ƀô̆ Dôm anih jang Đảng xăh oei tơgŭm hlŏh 95 triu hlak jên man hnam dơ̆ng.

Đei hnam, đei trong vă jang tŏk mŭk drăm, ƀok Y Đek hơđơ̆ng jơhngâm jang xa păng tơlĕch trong hơmet ăn tơdrong arih xa ning mônh kơnh: “Inh chă tŏk iŏk dơ̆ng jên đơ̆ng kơtum kơtŏng 'nhŏng oh đei 40 triu păng chă trong man đei hnam nhen dang ei. Dang ei đei hnam bơih 'noh hơđơ̆ng jơhngơ̆m hơdrin jang sa, vă dar deh kla pơđĭ jên oei hre, đang kơ 'noh adrin mong jên vă pơm dơ̆ng hnam gŏ păng hnam hum, gô đei ƀiơ̆ ning mônh kơnh ‘nŏh man pơxă hnam, man dơ̆ng lăm vă hnam gơ̆h xă ƀiơ̆".

Kiơ̆ kơ ƀok Y Sắk Kbuôr, Ƀok pơgơ̆r plei Cuôr, ưh khan lăp truh tơgŭm mĭnh 'măng đang 'noh veh hloi, rim chi ƀô̆ oei hơnơ̆ng pơvei, chă jet gia pơma nuh, năng tông, pơtho tơƀôh, tơlĕch trong jang hơdoi păng pơlung rim ŭnh hnam dar deh pơjing tơdrong arih xa hiôk sơđơ̆ng, ‘lơ̆ng hơiă. Trong jang ou tôch 'nao mă lei tôch đei yoa, tơgŭm ăn rim ŭnh hnam tơnuh đei anih oei sơđơ̆ng, ƀrư̆ ƀrư̆ jang tŏk.

Plei Cuôr dang ei đei hloh 370 ŭnh hnam mă lei đei vă jê̆ 100 ŭnh hnam tơnuh păng vă jê̆ tơnuh, ƀok Y Sắk hơmĕng: “Đơ̆ng trong jang, đei lơ tơdrong yak hơdai vang tơgŭm, kon pơlei đei trong jang tŏk ‘lơ̆ng ƀiơ̆, đei tơgŭm bơ̆n rơmo, man hnam, pơjing đon lui, hưch hanh vă kon pơlei adrin jang xa, jang tŏk. Hơpơi ‘meh truh âu kơnh gô đei dơ̆ng lơ tơdrong tơgŭm, đei tơdrong yak hơdoi thoi âu vă dôm bơngai pơmat tat gơ̆h đei dơ̆ng tơdrong ‘lơ̆ng kĕ jang tŏk klăih đơ̆ng mơmat tat, tưk tơiung mŭk drăm”.

Hăm hlŏh 7.000 unh hnam kon pơlei, lơ̆m nŏh vă jê̆ 900 unh hnam tơnuh păng vă jê̆ tơnuh, vă gơ̆h jang đei đon pơhnŏng ưh pă đei unh hnam yơ tơnuh lơ̆m sơnăm 2030 kiơ̆ Tơdrong tơchơ̆t Đảng ƀô̆ dêh char Đắk Lắk, xăh Ea M'Droh ưh gơ̆h gô chang, gơnang yoa dôm tơdrong tơgŭm đơ̆ng kơpal đĕch. Lăp đơ̆ng rŏng tơmât hơdai păng bơ̆ jang khul kơdră pơgơ̆r tơring 2 tăl, Anih chĕp kơ̆l Đảng xăh hlôi tơchĕng hơlen tơlĕch trong jang "Rim anih jang đảng vang yak hơdoi hăm unh hnam kon pơlei bơ̆ jang tŏk klăih đơ̆ng tơnuh hin", krao hơvơn rim chi ƀô̆ jang hơdoi kơjăp hăm rim unh hnam kon pơlei, vang hơmet pơ 'lơ̆ng mơmat tat, pơtho tơƀôh trong jang xa păng iŏk akŏm rim tơdrong tơgŭm.

Đơ̆ng rŏng mĭnh sơnăm, trong jang hlôi đei tơlĕch jang tơ̆ 4 chi ƀô̆, vang xut đei 2 tŏ hnam hiăh, tơgŭm 4 tơdrong jang xa, arih xa ăn rim ŭnh hnam tơnuh. Ƀok Nguyễn Văn Bông, Phŏ Bí thư chĕp kơ̆l Đảng xăh Ea M'Droh ăn tơbăt, tơring oei hue lăng truh tơdrong pơjing trong jang vă rim chi ƀô̆ gơ̆h jing anih gơnang tơpă đơ̆ng kon pơlei: "Tơdrong hơmĕng tih hlŏh ưh kơsĭ bơ̆n tơgŭm đei dôm yơ jên, dôm tŏ hnam, dôm tŏ rơmo, mă kăl ‘nŏh jĭ pơjing đei đon lui ăn kon pơlei kon kông, tơƀôh hơdăh tơdrong ưh hŭt hơchăng bu tơ̆ rŏng păng hơnơ̆ng đei kăn ƀô̆ chĕp kơ̆l pơgơ̆r tơring vang yak hơdoi. Hơdai hăm 'nŏh sư tơgŭm ăn kơdih kâu đe kăn ƀô̆, đảng viên mưh năm bơ̆ jang tơ̆ tơring gơ̆h jê̆ kon pơlei, hlôh vao kon pơlei hlŏh dơ̆ng".

Đơ̆ng rŏng dôm tơdrong jơnei blŭng a, Anih chĕp kơ̆l Đảng xăh Ea M’Droh oei hơlen năng trong jang vă hơnơ̆ng hơmet pơ ‘lơ̆ng păng pơih xă truh tơ̆ dôm chi ƀô̆ hnam  trưng, hăm đon hơmĕng tưk tơiung jơhngâm đon vang yak hơdoi truh hăm lơ tơdrong lơ̆m tơdrong arih xa tơ̆ tơring.