Hao thŏng nan huơ̆r hơdih tơ̆ kơpal đak Bàu Đá, gơ̆h lăng ƀôh hơdăh lơ tơmam tơ̆ hơla đak hlăng rơngơp. Bơ̆n ‘nhĕt, ‘long, tơmo tih iĕ hngơl hngônh, păng bơ̆n pơkao sen ƀâu phu prăt pơyan he, roi pơm ăn cham char Bàu Đá roi 'lơ̆ng hơiă. Đĭ hlŏh 70 sơnăm ƀok Đào Kim Thông oei tơ̆ plei Mỹ Điền, xăh Hòa Thịnh hlôi tơklep hăm bri trơ̆p âu đơ̆ng ‘lơ̆p vang kŭm hlŏh khei 'năr tơblăh vang krưp krĕnh. Đơ̆ng trơ̆p Bàu Đá âu hlôi tơgŭm ăn kon pơlei păng rong hơrih Kăch mang vă pơm đei tơdrong iung tơblăh Hòa Thịnh sơnăm 1960. 

"Kăch mang păng kon pơlei tơ̆ âu ‘noh jĭ ƀơ̆t chăl kơdâu ayăt.. hao thŏng nan mơ̆t pơm pơsŭn tơ̆ hơla ‘long tih, mơ̆t tơ̆ âu oei văi. Ƀôh gre păr ‘noh mơ̆t ôn lơ̆m ‘nhĕt.  Vang iung tơblăh bơih truh sơnăm 63, 64 hơnơ̆ng kơdâu kơ ayăt, bơ̆n kơdâu mơ̆t tơ̆ trơ̆p âu, tŏk tơ̆ kông ôn lơ̆m 'nŏh."

Khei 7 păng Khei 8, pơkao sen tih, pơkao sen iĕ tơ̆ Bàu Đá Hòa Thịnh oei tôch kơ 'lơ̆ng. Kơmâu hŏng, kơmâu kơk, kơmâu hĭm đơ̆ng dôm pơkao vang tơlang blŭng hăm pơkao trŏl đơ̆ng kơpal.. roi pơm ‘lơ̆ng um ai trơ̆p Bàu Đá. Hăm kon pơlei tơring, Bàu Đá jĭ hơnih lăng ‘lơ̆ng hơiă hai, jing tơring teh kăp gĭt, kŭm jing hơnih đei lơ tơmam hai:

"Ĭnh ƀôh tơdrong ‘lơ̆ng tơ̆ trơ̆p Bàu Đá ‘nâu ‘noh đei đŏk, đei ka, sem, ‘long, pơkao sen... Đei tôm kơloăi ‘long hloi. Lơ̆m âu chă tơmang lăng ‘noh ‘lơ̆ng dêh. Đơ̆ng khei 12 klĕp truh khei 9, khei 10 dương lịch ‘noh ‘lơ̆ng hloh.”

Prăt lơ sơnăm âu ki, kon pơlei plei Mỹ Điền, pơma hơdrô̆ păng dôm pơlei, dôm xăh tơ jê̆ hơrih pơ mơ̆ng lơ̆m iŏk yua ka hơdang đơ̆ng tơring trơ̆p âu. Ưh khan lăp thoi noh, hăm cham char bri brăh tôch kơ ‘lơ̆ng, kŭm hăm ka hơdang, ‘long, pơkao lơ, tơring trơ̆p Bàu Đá Hòa Thịnh tŏk bŏk dơ̆ng tơ̆ hơnăp tơdrong hiôk hơtŏk tơiung chă tơmang lăng cham char bri brăh. Ƀok Phương Văn Lành, Bí thư Đảng ủy xăh Hòa Thịnh tơbăt, tơring tơƀôh trong vă jang hơtŏk tơiung trơ̆p Bầu Đá jing hơnih chă tơmang lăng tơpôl tơklep hăm vei lăng cham char bri brăh:

“Tơring hlôi pơgơ̆r pơlong lăng tour chă tơmang lăng Bàu Đá. Vă jê̆ truh ‘noh gô pơjing tơdrong jang hơtŏk tơiung chă tơmang lăng tơpôl kiơ̆ trong pơjing hơp tak xăh chă tơmang lăng tơpôl, păng dôm kon pơlei tơ̆ pơlei Mỹ Điền âu gô jing dôm bơngai kơtă vang jang chă tơmang lăng. Đe sư huơ̆r thŏng nan ba tơmoi chă lăng trơ̆p Bàu Đá, păng gô jing bơngai chă roi tơƀôh cham char, tơmam ‘lơ̆ng kŭm hăm hơnih hơiă đơ̆ng trơ̆p Bàu Đá âu”.

Hòa Thịnh - hơnih hlôi jing đei đak lŏk tih mơmat tat dang ei tŏk bŏk đei tơplih ‘lơ̆ng. Tơdrong tơiung tơmam chă tơmang lăng tơ̆ trơ̆p Bàu Đá ưh khan lăp pơih đei tơdrong jang sa ‘nao, hơtŏk ‘lơ̆ng tơdrong hơrih sa ăn kon pơlei, mă oei jing tơkhoă măih vei lăng ‘lơ̆ng đêl so kơ cham char bri brăh.