Vang truh hop akŏm đei hloh 150 ‘nu bơngai tang măt ‘noh jĭ dôm bơngai vei lăng, bơngai joăt jang, bơngai jang khoa hŏk; bơngai tang măt lơ hnam trưng đại học, anih tơchĕng hơlen, anih mơdro sa, hơp tak xăh lơ̆m păng ‘ngoăih dêh char. Nơ̆r pơma tơroi tơ̆ hop akŏm ăn ƀôh, tơdrong pơjing trong jang hơdai kơjăp đơ̆ng teh đak - Hnam trưng - Anih mơdro sa ‘noh jĭ ‘meh vă kăl hloh vă Lâm Đồng tŭn pran hơtŏk tơiung khoa hŏk, kơmăy kơmŏk păng tơplih ‘nao.

Tơdrong ‘nâu đei ƀôh đơ̆ng yan âu ‘noh jĭ khŭl kơdră chĕp kơ̆l jang tơdrong jang tơgŭm tam mă kiơ̆ hơdai hăm ‘meh vă yan âu; tơchĕng hơlen khoa hŏk tam mă hơdai hăm ‘meh vă pơm tơlĕch, tĕch mơdro; pơtôch hơlen lăng tam mă đei pơjao đei yua, ƀơ̆t mă anih mơdro sa mơmat kơ tơjê̆ hăm kơmăy kơmŏk păng bơngai joăt jang. Ƀok Nguyễn Ngọc Phúc, Phŏ Kơdră Anih vei lăng kon pơlei dêh char Lâm Đồng, akhan, lơ̆m trong jang hơdai anih mơdro sa tơlĕch ăn ƀai toan, hnam trưng păng bơngai jang khoa hŏk tơblang ƀai toan, Teh đak pơm trong jang tơgŭm, tơgoăt jên jang, tơgŭm jên jang păng pơtrŭt iŏk yua, tĕch mơdro jơnei ‘lơ̆ng.