Hơdrol kơ năr năm hop akŏm, Khul tang măt ăn Quốc hội dêh char Lâm Đồng hlôi đei jơ bơ̆ jang Anih jang vei lăng kon pơlei dêh char, Anih jang Mặt trận tổ quốc Việt Nam dêh char hơdai hăm dôm anih jang kơpal vă hơlen, băt hơdăh dôm tơdrong mơmat tat, tơhlăk tơhlĭn lơ̆m tơdrong pơm kiơ̆ khôi luơ̆t.

Tơpă yan âu đơ̆ng Pơbăh Tây Nguyên ăn ƀôh, trong jang tơdrong tơgŭm mă đơ̆ng hlôi đei tơplih mă lei oei đei dôm tơdrong tơhlăk tơhlĭn kăl kơ jăh hơmet pơ 'lơ̆ng. Bơngai tang măt ăn Anih vei lăng kon pơlei dêh char Lâm Đồng pơtruh nơ̆r hăm Trung ương hơnơ̆ng hơmet pơ 'lơ̆ng khôi luơ̆t kiơ̆ pơkăp hơdai drơ̆ng minh nơ̆r; tơjur khei năr pơm hla ar bơ̆jang; pơm ƀônh hla ar iŏk pơdreo păng iŏk pơdreo teh đei khei ‘năr pơkăp. Hơdai hăm noh, tơring hơpơi meh jăh hơmet pơ ‘lơ̆ng dôm tơdrong tơhlăk tơhlĭn găh trong vă jang unh điên, anih pơtruh, kơjă teh, chă bơngai răt teh hăm kơjă lơ hloh, mŭk drăm teh đak vă hơmet pơ ‘lơ̆ng jên, tơmam jang, sơng dei tơmơ̆t jên jang.

Hơdai hăm ‘noh, Khul kơ dră chĕp kơ̆l Anih MTTQ Việt Nam dêh char athei hơmet pơ kĕh dôm tơdrong hơgăt găh dăr lăng, tơblang tơƀôh ăn tơpôl, klăih song hơdăh hơ năp jang đơ̆ng rim anih jang lơ̆m tơdrong chih iŏk, tơl tơblang păng bơ̆jang kiơ̆ nơ̆r apinh đơ̆ng rŏng dăr lăng. Bơ ngai tang măt ăn dôm anih jang kơpal kŭm hlôi tơgop lơ nơ̆r kăp gĭt lơ̆m 15 hla ar chih luơ̆t păng 4 hla ar chih tơdrong tơchơ̆t, mă loi akŏm lơ̆m Luơ̆t tĕh (đei chih hơmet ming), Luơ̆t hnam oei (đei chih hơmet ming), Luơ̆t tĕch mơ dro tĕh, hnam (đei chih hơmet ming), Luơ̆t phak jên (đei chih hơmet ming) dăh mă dôm luơ̆t găh khul linh, vei sơ đơ̆ng tĕh đak...

Chih akŏm dơ̆ng kơjă kăp gĭt đơ̆ng dôm nơ̆r apĭnh âu, ƀok Y Thanh Hà Niê Kđăm, Bơngai jang lơ̆m Trung ương Đảng, Bí thư Đảng dêh char, Kơdră Khŭl tang măt dêh char Lâm Đồng pơma hơdăh:

“Dôm nơ̆r pơma đơ̆ng dêh char hăm Khul hlôi tơgŭm ăn kơ khul đei dôm tơdrong kơtơ̆ng ang tôch rơđăh, đei yoa tơpă vă khul pơma nuh lơ̆m hop akŏm mă loi jĭ lơ̆m tơgop hơmet pơ 'lơ̆ng dôm tơdrong tơhlăk đơ̆ng dôm tơdrong tơchơ̆t đơ̆ng Trung ương. Hăm dôm nơ̆r pơma, nơ̆r apĭnh đei tơlĕch lơ̆m jơ bơ̆ jang hrei 'nâu Khul tang măt Kuô̆k hô̆i dêh char vă chih akŏm, klăih song păng rơih iŏk dôm tơdrong tơm, mă lăp vă vang pơma nuh tơ̆ grŭp, pơma nuh tơ̆ hnam hôp, đang kơ 'nŏh gơih ăn dôm anih jang kơ Kuô̆k hô̆i, Khul kơdră teh đak, Thủ tướng teh đak păng dôm anih tơm, anih jang kơpal Trung ương set hơlen sek tơlang kiơ̆ tơdrong gơ̆h jang".

Tơdrong Quốc hội kơchăng pơgơ̆r Hop akŏm ưh kơ ê vă tơtom tơchơ̆t dôm tơdrong kăl tơƀôh hơdăh jơhngơ̆m đon yak hơdoi, tơlĕch trong jang hơbĕch hơbal yua kơ tơdrong hơtŏk tơiung atŭm. Dôm nơ̆r pơma tơpăt, ƀĕnh tơdrong yan âu đơ̆ng Lâm Đồng 'noh jĭ ‘long rek pơtŏ 'lơ̆ng hloh ăn jơhngơ̆m đon "kon pơlei băt, kon pơlei pơma dơnuh, kon pơlei jang, kon pơlei hơlen lăng". Pơm hiôk dôm tơdrong pran găh teh, ŭnh hơyuh păng anih jang kăl ưh khan lăp jing nơ̆r tơl ăn tơdrong hơtŏk tơiung kơ Lâm Đồng mă oei tơgop 'lơ̆ng ăn tơdrong tơplih 'nao pran kơtang kơ tơring Tây Nguyên lơ̆m jăl jang hơtŏk tơiung 'nao.