Lơ̆m 7 khei âu ki, dêh char Khánh Hòa sơng đei hlŏh 15 triu ‘nu tơmoi chă tơmang lăng, tŏk vă jê̆ 39% pơting hăm khei âu sơnăm 2025; lơ̆m noh tơmoi đơ̆ng teh đak đe đei dang 5,5 triu ‘nu bơngai păng akŏm đĭ đăng iŏk yoa pơhlom hlŏh 82.000 ti hlak jên. Hơdrô̆ lơ̆m khei 7, Festival Đak dơsĭ Khánh Hòa 2026 hăm hơnăn " ‘Lơ̆ng rŏ Đak dơsĭ – Tŏk dang ăi hăm apŭng plenh teh” jing jơhngâm pran tih mưh sơng đei vă jê̆ 790 rơbâu ‘nu tơmoi lơ̆m 3 năr pơgơ̆r lêh, hơnhăk ba hlŏh 1.300 ti hlak jên. Bơngai tang măt ăn Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char ăn tơbăt, tơ̆ hơnăp kơnh tơring vă pơih trong păr tơpăt Đồng Hới - Cam Ranh, hơtŏk tơdrong sơng iŏk tơmoi đơ̆ng Trung Quốc, pơtho khul jang pơma nơ̆r Nga, hơmet pơ ‘lơ̆ng tơdrong tơgŭm chă tơmang lăng lơ̆m tơpôl păng pơm pơkeh hla ar vă chih tơbăt Anih chă tơmang lăng gĭt kăl kơ teh đak găh Tu achon kông Cam Ranh vă năm truh tơdrong jang tŏk pran kơjăp.

Đơ̆ng blŭng sơnăm truh dang ei, dêh char Đắk Lắk sơng dang 5,3 triệu ‘nu tơmoi, tŏk 37% pơting hăm khei ‘nâu sơnăm sơ̆ păng iŏk đei akŏm jên hloh 9.600 ti hlak jên. Vă jang đang tơdrong hơgăt sơng 10 triệu ‘nu tơmoi lơ̆m sơnăm, Anih pơgơ̆r jang Hơtŏk tơiung chă tơmang lăng dêh char drơ̆ng nơ̆r akŏm chih hơmet pơ ‘lơ̆ng tơdrong jang hơtŏk tơiung chă tơmang lăng jăl jang 2026-2030, pơjing hơnăn lăng băt, hơtŏk tơiung tơmam OCOP tơklep hăm chă tơmang lăng păng tŭn pran tơplih kơsô̆. Kơdră chĕp kơ̆l Anih vei lăng kon pơlei dêh char athei rim anih jang hơtŏk loi dơ̆ng jang hơdai tĕch mơdro hăm chă tơmang lăng, hơtŏk tơiung chă tơmang lăng choh pơtăm, tơpôl păng hơmet pơ ‘lơ̆ng tơhlăk tơhlĭn ăn rim tơdrong jang. Mă kăl ‘noh, anih vei lăng joh ayŏ kơdŏ soang kăl kơ jang hơdai tơgŭm pơm hơnih truh, pơih tơmam chă tơmang lăng ‘nao hơdrô̆ tơ̆ rim tơring đei tơmam ‘lơ̆ng nhen Ea Kao, Tuy Hòa, Lắk vă pơm tơdrong pha ra păng sơng đei tơmoi chă tơmang lăng lơ̆m sơnăm 2027.