Quốc hội gô lăng hơlen, pơdrơ̆ng kiơ̆ 15 tơdrong vă pơjing khôi luơ̆t, 4 tơdrong vă pơjing tơdrong tơchơ̆t khôi luơ̆t; ăn tơgop nơ̆r hăm 7 tơdrong vă pơjing khôi luơ̆t, lăng hơlen, tơchơ̆t tơdrong bơ̆ jang kơ rim kơdră jang lơ̆m Khul kơdră chĕp kơ̆l pơgơ̆r Quốc hội păng tơchơ̆t 06 tơdrong kăl găh mŭk drăm-tơpôl, tơmơ̆t jên jang. 'Nâu jing tơdrong jang lơ, lơ̆m âu đei lơ tơdrong đei ƀơm truh kơtă hăm kon pơlei, hơnih mơdro sa, tơdrong bơ̆ jang kơ khul kơdră chĕp kơ̆l pơgơ̆r teh đak păng hơtŏk tơ iung mŭk drăm-tơpôl.

Tơ̆ hop akŏm, Quốc hội hơnơ̆ng hơmet pơ 'lơ̆ng khôi luơ̆t vă hơmet pơ 'lơ̆ng tơhlăk tơhlĭn, tơgŭm păng pơjing hơyak pran hơtŏk tơ iung. Lơ tơdrong vă pơjing khôi luơ̆t đei ƀơm truh kơtă truh hơnih tơmơ̆t jên jang, tĕch mơdro păng tơdrong kĕ pơjei kơ tơdrong jang mŭk drăm; trŏ lăp hăm tơdrong 'meh vă tơplih 'nao khul kơdră chĕp chĕp pơgơ̆r, bơ̆jang khul kơdră chĕp kơ̆l pơgơ̆r tơring 2 tăl, hơtŏk kơtang pơjao tơdrong jang, pơjao tơdrong gơ̆h jang păng hơtŏk kơtang bơ̆jang 'lơ̆ng kơ khul kơdră chĕp kơ̆l pơgơ̆r teh đak; hơmet pơ 'lơ̆ng khôi luơ̆t vă pơtrŭt khoa hŏk, kơmăi kơmŏk, tơplih 'nao hơgei păng tơplih kơsô̆.