Đơ̆ng blŭng sơnăm truh dang ei, mă đơ̆ng Cham gre păr Liên Khương athei pơdơ̆h amơ̆i kơ jang vă hơmet ming, chă tơmang lăng Lâm Đồng oei sơng vă jê̆ 12 triệu 'nu tơmoi, iŏk yoa jô̆ păh lăp đei hlŏh 33 rơbâu ti hlak jên. Dôm kơsô̆ ‘noh ăn ƀôh tơdrong 'lơ̆ng hơiă đơ̆ng tơring teh 'nao oei tôch tih. Mă lei, tơ̆ rŏng kơ dôm kơsô̆ tŏk 'nŏh jĭ mĭnh nơ̆r apinh tam mă đei nơ̆r tơl. 'Nŏh jĭ pơm thoi yơ vă gơ̆h iŏk yoa đei tơdrong 'lơ̆ng đơ̆ng groi kông Đà Lạt, bri kông Đắk Nông păng đak dơsĭ Bình Thuận vă gơ̆t jơ̆ng tơmoi lơ năr ƀiơ̆.

Lăng ƀôh tơdrong hiôk đơ̆ng rŏng kơ tơmơ̆t hơdai, lơ kŏng ti chă tơmang lăng hlôi tơtĕnh pơjing dôm tour tơƀưh băl. Pơgê lăng 'năr lĕch tơ̆ đak dơsĭ Mũi Né – Kơsơ̆ yak ngôi tơ̆ trong kơphô̆ Đà Lạt – Năr đơ̆ng rŏng hao thŏng nan tơ̆ dơnâu đak Tà Đùng. Mĭnh tơdrong chă tơmang lăng nhen tôch hơiă, mă lei ƀơ̆t iŏk jang, ưh kơ tŏ sĕt anih mơdro sa ‘noh kơtơih ƀơm "tơdrong tơhlăk" joăt joe hloh: trong nơnăm. Ƀok Hoàng Công Định, Kơdră vei lăng Kŏng ti Tĕch mơdro păng Chă tơmang lăng Dima Tour, tơroi:

 “Gĭt kăl hloh 'nŏh jĭ jăh tơtĕnh hơtŏk tơiung đei trong nơnăm tơdăh ư̆h 'nŏh tôch mơmat mă gơ̆h tơgoăt đei rim tour đơ̆ng 3 tơring Mũi Né- Đà Lạt- Đăk Nông. Trong nơnăm oei tơƀơ̆p tôch lơ tơdrong mơmat tat. Kŭm hơpơi đei mĭnh trong nơnăm đơ̆ng Đăk Nông trŭh tơ̆ Đà Lạt, Mũi Né gơ̆h hơtŏk tơ iung hrĕnh hlŏh vă pơjing đei lơ tour trong mă gơ̆h năm dang 3 trŭh 5 năr ăn tơmoi chă tơmang lăng 'nŏh lăp hlŏh".

Ưh khan lăp anih mơdro sa đĕch, kơdih tơmoi chă tơmang lăng kŭm ƀôh hơdăh dôm tơdrong ưh kơ 'lơ̆ng 'năi. Dôm hơnih teh hơlih, dôm taluy pơchăh, tĕh tơmo oei rơgôn rơgan đơ̆ng rŏng kơ 'mi pơm ăn tơdrong yak vih vât đei hơmĕng jĭ trong tơƀưh 'lơ̆ng đơ̆ng đak dơsĭ păng groi kông jing tơdrong bơngơ̆t hăm lơ bơngai. Ƀơ̆t blŭng khei 7 âu ki, lơ̆m 'măng năm đơ̆ng Phan Thiết tŏk tơ̆ Đà Lạt păng vih hơlơ̆k dơ̆ng kiơ̆ trong gre 28, 55, 28B, mŏ Triệu Thị Hồng Phúc lơ 'măng athei hao dơ dar tơ̆ hơnăp dôm hơnih teh hơlih tơter trong.

 "Đei 4, 5 hơnih, kial hơbŭt 'nŏh năm hơlih hloi. Ƀôh hli. Oei trong păih âu 'nŏh 'mĕh hơlih đĭ hloi bơih 'nŏh. Tĕh, tơmo, chuơ̆h 'mi hơlih tơdrŭt hloi. Dôm tŏ trong tơring kông krang, trong kơvĕch đei dôm hơnih hơlih 'nŏh bơ̆n athei pơm kơjăp dơ̆ng dôm hơnih kông vă sư kơjăp 'lơ̆ng ƀiơ̆ oei lê̆ lăng ‘noh krê dêh. ‘Noh ‘năr tŏ gơh năm ăn ‘mi ưh kơ pơ̆n năm ôh."

Kơtă tơ̆ hơnih kơdrơ̆m Đà Lạt, hơnih đei lăng jĭ "plei nuih" kơ chă tơmang lăng Lâm Đồng, oei đei lơ tơdrong ưh kơ 'lơ̆ng pơm ăn lơ bơngai ưh kơ lăp đon. Prăt hloh mĭnh sơnăm kơ ou, ŭnh điên tơ̆k hơdăh tơ̆ kông krang Prenn – 'măng mơ̆t lĕch tơm truh tơ̆ Đà Lạt pơđĭ jăl trong ưh kơ đei tơ̆k hơdăh tơ̆ kơmăng ƀơm lơ tơdrong ưh kơ 'lơ̆ng. Tơ̆ dơnou Xuân Hương, mĭnh tơdrong jang tih lơ sơnăm hŭt hơchăng pơm ăn um rup ưh kơ lăp hăm tơdrong hơpơi 'meh vă kơ mĭnh anih kơdrơ̆m chă tơmang lăng hơgei.

'Noh lăp jing dôm um rup ƀônh kơ lăng ƀôh, tơdrong kăl kơ tơchĕng hloh oei lơ̆m kơdih tơmam tơmang lăng. Đà Lạt lơ tơmoi. Mă lei tơmoi chă răt yua tam mă lơ. Ƀok Nguyễn Văn Lộc, sơ̆ pơm Kơdră Anih vei lăng găh Joh ayŏ, Tơplŏng kơdâu păng Tơmang lăng Lâm Đồng, dang ei 'noh Bí thư Đảng ủy phường Xuân Hương – Đà Lạt, tơpăt lăng ƀôh:

“Truh tơ̆ Đà Lạt kơmăng truh 9 jơ 'nŏh vih tep, ưh ‘noh jĭ chă năm dăr lăng tŏ sĕt huch đak toh đĭ bơih. Yoa thoi nŏh tơdrong 'mĕh vă răt yoa đơ̆ng chă tơmang lăng Lâm Đồng bơ̆n 'nŏh tŏ sĕt. Bơ̆n tơplih ming đon tơchĕng dang ei jang chă tơmang lăng ưh gơ̆h jô̆ kơ̆l bơngai mĭnh khei dôm yơ tơmoi truh hăm Lâm Đồng. Bơ̆n đa chih akŏm vă roi tơbăt mă 'lơ̆ng mă lei inh tơchĕng athei tơplih lơ̆m trong lăng, hơlen năng tơdrong tơpă yan âu đơ̆ng chă tơmang lăng".

Truh dang ei trong vă jang hơtŏk tơiung tơmam chă tơmang lăng lơ tơring đơ̆ng rŏng tơmơ̆t hơdai dêh char găh lơ oei lơ̆m hla ar chih; dôm tơmam chă tơmang lăng tơgoăt groi kông – bri kông – anih kơdrơ̆m đak dơsĭ găh lơ oei tơ̆ hơnăp kơnh đĕch; tam mă pơjing đei rơđăh dôm jăl trong, trong jang tơmam 'lơ̆ng kĕ pơjei lơ đơ̆ng rim tơring. Ƀok Hồ Văn Mười, Bơngai jang lơ̆m Trung ương Đảng, Phŏ Bí thư Đảng dêh char, Kơdră Jơnŭm pơgơ̆r kon pơlei dêh char Lâm Đồng, tơpăt lăng ƀôh:

“Nhôn băt hơdăh tơdrong jang chă tơmang lăng 'noh mĭnh lơ̆m pêng tơdrong jang tơm kơ mŭk drăm đơ̆ng rŏng kơ tơmam drăm kăl lơ̆m teh, ŭnh hơyuh păng choh jang sa kơmăi kơmŏk hơgei. Mă lei ĭnh ƀôh 'noh tam mă đei mĭnh tơdrong drơ̆ng nơ̆r păng tam mă đei pơgơ̆r kơjăp, tơgoăt hơdai hăm khul kơdră chĕp kơ̆l, Anih vei lăng Joh ayŏ kơdŏ soang, Tơplŏng kơdou păng Chă tơmang lăng, rim tơring vă kơ pơjing đei tơdrong 'lơ̆ng hơ iă ăn tơdrong jang chă tơmang lăng".

Tơmơ̆t hơdai hlôi pơih đei mĭnh hơnih hơtŏk tơiung 'nao, mă lei anih jang chă tơmang lăng Lâm Đồng kăl kơ lơ hloh dơ̆ng dôm tơdrong tơchĕng hơgei dăh mă dôm kơsô̆ tŏk. Lăp mưh trong nơnăm đei tơƀưh băl, tơmam đei pơm 'nao, păng dôm tơring akŏm mĭnh trong jang, tơdrong chă tơmang lăng tơring teh 'nao gô ưh khan lăp kơjung hloh, mă oei kĕ gơ̆t jơ̆ng tơmoi.