Sơkơ̆t pơtôch tơdrong hop akŏm, Phŏ Thủ tướng Lê Tiến Châu ră hơdah: tơdrong jang pơtho pơhrăm kăl vei sơđơ̆ng đon pơm jang, sơ̆n hăm tơdrong tơplih 'nao kiơ̆ trong 'lơ̆ng hơgei, jang hơdoi mă lei athei kơchăng, tơnăp păng rơih jang mă trŏ. Gah tơdrong pơtho păng iŏk bơngai hŏk, Phŏ Thủ tướng athei pơkăp hơdah tơchơ̆t kơ rim 'măng pơlong. Hăm iŏk bơngai hŏk lăm 10, Hơnih tơm Pơtho Pơhrăm athei tơbang tơdrong pơkăp trŏ, klah asong gah pơtho tơdrong jang; pơjao ăn tơring rơih trong iŏk bơngai hŏk mă trŏ ƀlep, hơdrô̆ pơgơ̆r pơlong hăm dôm hnam trưng chuyên păng hnam trưng pơtho hŏk hơgei vă da ƀiơ̆ hrat ăn bơngai hŏk.

Hăm 'măng pơlong đĭ 'măng khuă lăm 12, Phŏ Thủ tướng athei vei sơđơ̆ng vă pơkăp trŏ tơdrong kăl, atŭm hăm noh tơplih 'nao tơdrong dăr hơlen pơkăp. Phŏ Thủ tướng akhan, tơdrong jang pơtho pơhrăm athei sek tơlang mă tơnăp dôm tơdrong pơm glăi mă lei athei đei đon bơnôh 'lơ̆ng, khŏm mă sut lê̆ tơdrong tơroi pơyua ou to, vei sơđơ̆ng trong tơplih 'nao kơyuơ kơ tơdrong rơgei tơpă.