Tơchơ̆t tơbang hơdah groi teh jĭ mŭk drăm kăp gĭt kơ teh đak, hơnih oei xa păng hơtŏk tơ-iung; jing tơdrong tơm pơjing đei teh đak, tơdrong pơgơ̆r jang mŭk drăm păng vei sơđơ̆ng tơpôl teh đak; jing tơmam drăm pơm jang kăp gĭt, tơdrong pran vă hơtŏk tơ-iung teh đak. Groi teh noh kơyuơ kon pơlei vei lăng kơyuơ teh đak tang măt păng pơdrơ̆ng gah vei lăng; ưh gơh pơjing ăn tơ-'ngla kơdih gah groi teh păng ưh đei asong bơngai teh đak đe gơh tĕch răt păng yua teh hăm rim tơdrong.

Teh đak pơm sơnong tang măt vei lăng kiơ̆ tơdrong pơkăp teh, tơchơ̆t yua teh; thu iŏk teh, pơjao teh, ăn thuê teh, sơkơ̆t hơdah tơdrong yua teh, asong gơh yua teh păng pơkăp khei năr yua teh; tơchơ̆t kơjă teh 'nou nai hia. Sơnong gơh yua teh, mŭk drăm tơguăt hăm groi teh đei khôi luơ̆t vei vêr.  

Gah pơkăp hơdah, Tơchơ̆t tơƀôh hơdah Tơdrong chih akŏm tơdrong kăl kơ teh đak gah groi teh kiơ̆ pơkăp akŏm, pơdrơ̆ng, 'nao kiơ̆ lơ tơdrong kăl; vei sơđơ̆ng gơh tơroh tơroi tơdrong kăl hăm tơdrong chih akŏm kơ sơ yư lĭu kơ teh đak gah tơring kon pơlei oei xa, thuê̆ 'nou nai hia. Truh đĭ sơnăm 2026, keh đang tơdrong chih akŏm kơ sơ yư lĭu hăm tôm groi teh hlôi đei akŏm hơdah. Hơdrin truh đĭ sơnăm 2027, keh đang tơdrong pơkă pơm um la kak groi teh, chih hô sơ groi teh păng chih akŏm kơ sơ yư lĭu groi teh hăm teh tam mă đei chih akŏm lơ̆m kơ sơ yư lĭu.

Gah chĭl 'mong, tơgŭm, asong hơnih oei xa 'nao, thu iŏk teh, tơchơ̆t tơƀôh hơdah tơdrong thu iŏk iŏk mưh đei tơdrong kăl hloh kơyuơ tơdrong vei sơđơ̆ng tơpôl, hơtŏk mŭk drăm – tơpôl, kơyuơ tơdrong pơyua ăn teh đak, kon pơlei pơla. Tơplih kơtang đơ̆ng đon tơchĕng “chĭl 'mong mŭk drăm hlôi ƀơm thu iŏk” jing đon tơchĕng “hơmet tơdrong hơrih ăn kon pơlei ah Teh đak thu iŏk teh”. Dôm pơkăp asong hơnih oei 'nao athei sơđơ̆ng hnam oei, tơdrong kăl truh tơdrong hơrih kon pơlei. Jang hơdah tơchơ̆t hăm bơngai đei teh ƀơm thu iŏk athei đei hơnih oei, tơdrong hơrih hơtŏ dah mă 'lơ̆ng hloh kơ hơnih oei so.

Teh đak pơkăp, dăr hơlen păng tơchơ̆t kơjă teh ah tơmơ̆t yua, ưh đei lê̆ pơjing đei lơ pơkăp kơjă. Kơjă teh kơyuơ Teh đak tơchơ̆t kiơ̆ kơ tơdrong kăl hơtŏk tơ-iung kơ rim jăl jang, vei sơđơ̆ng jang hơtŏk mŭk drăm – tơpôl. Teh đak tơchơ̆t kơjă teh, tơdrong hơmet kơjă teh, iŏk jên yua teh, jên thuê teh, kơsô̆ chĭl 'mong trŏ ƀlep hăm tơdrong hơrih, kiơ̆ kơ rim kơluăi teh vă sơđơ̆ng ăn tơdrong hơdah 'lơ̆ng, hơtŏ hơnơ̆ng, 'lơ̆ng pơyua ăn teh đak, kon pơlei păng hơnih asong jang.  

Gah pơgơ̆r pơm jang, Tơchơ̆t pơjao pơm jang hơdah gah bơngai, hơdah tơdrong jang, hơdah sơnong jang ăn dôm hơnih jang Trung ương, rim hơnih jang, rim tơring lơ̆m tơdrong pơgơ̆r jang kiơ̆ Tơchơ̆t, mă kăl noh sơnong chih hơmet Luơ̆t Groi Teh păng dôm luơ̆t đei tơrĕk, vei sơđơ̆ng tơdrong pơdrơ̆ng trŏ ƀlep păng tơtom.