Iung pơma pơgơ̆r, Tổng Bí thư, Kơdră teh đak Tô Lâm pơma hơdăh, Hop akŏm Trung ương 3 hlôi drơ̆ng nơ̆r ‘lơ̆ng lơ tơdrong, tơchơ̆t lơ trong jang tih găh pơjing Đảng, khŭl jang chĭnh trĭ, hơtŏk tơiung păng vei lăng teh đak. ‘Nâu jĭ hơyak năm hơdăh ‘lơ̆ng gĭt kăl Tơdrong tơchơ̆t Hop akŏm XIV kơ Đảng, tơklep hơnăp jang sơnăm 2026 hăm tơdrong hơgăt pơđĭ jăl jang, truh sơnăm 2030, sơnăm 2045. Tổng bí thư, Kơdră teh đak athei rim kơdră Đảng jăh tơtĕnh jang kiơ̆ ‘lơ̆ng Tơdrong tơchơ̆t jing bơ̆jang kiơ̆ yan âu, đei tơdrong tơm, rơđăh tơdrong tơgŭm hơdrol păng trŏ lăp ‘lơ̆ng hăm rim anih tơm, anih jang, tơring.

Găh khŭl kơdră tơring 2 tăl, Trung ương ưh kơ tơlĕch tơdrong proh hơmet hơnih bơ̆jang kơ xăh vă pơvei khŭl bơ̆jang sơđơ̆ng; tơdrong hơmet ming lăp tơlĕch mưh kăl tơpă, athei khoa hŏk, pơ ‘lơ̆ng, yak truh pơyua ăn Kon pơlei ‘lơ̆ng hloh păng khŏm hŭt lê̆ đon tơchĕng “hiôk ăn kang ƀô̆, mơmat ăn kon pơlei”. Tổng Bí thư pơma hơdăh, lơ̆m 6 khei hơtuch sơnăm 2026, pơđĭ khŭl jang athei vei sơđơ̆ng bơngai jang hơnơ̆ng, akŏm hơmet pơ tôch dôm tơdrong tơhlăk kăl, hơdrin jang đang jơnei dôm tơdrong hơgăt hơtŏk tơiung mŭk drăm - tơpôl hlôi tơlĕch ăn.

Pơgê năr 29/7, Hơnih chĕp pơgơ̆r Trung ương Đảng pơjing tơlĕch Tơdrong tơchơ̆t kơsô̆ 207-QĐ/TW găh dôm tơdrong đang viên ưh kơ gơh kơ pơm (tơplih ăn Tơdrong tơchơ̆t kơsô̆ 37-QĐ/TW). Đŏk tơbăt tơ̆ Hop akŏm lơ̆m teh đak tơlĕch jang kiơ̆ Tơdrong tơchơ̆t Trung ương 3 jăl XIV, Kơdră chĕp pơgơ̆r Hơnih bơ̆ jang dăr lăng Trung ương Trần Sỹ Thanh pơma hơdăh dôm tơdrong hle tôch gĭt kăl trŏ lăp hăm chăl hrei ou. Mă kăl, Tơchơ̆t tơmơ̆t dơ̆ng dôm tơdrong mă đang viên ưh kơ pơm “Pơjĭp lơ̆m tơdrong proh hơmet khul chĕp pơgơ̆r vă pôk hơtŏk bơngai jang ưh kơ gan gơh, ưh kơ ‘lơ̆ng lơ̆m kơchư̆k jang gơh pơjao jang”. ‘Nou jĭ dôm trong tơtom vă tang găn tơdrong "tơmơ̆t” bơngai boăl, jang ưh kơ gan gơh lơ̆m rim kơchư̆k kăl lơ̆m jơ ‘năr iung jang kiơ̆ pơm kơtoei khul kơdră chĕp pơgơ̆r păng proh hơmet tơring. ‘Ngoăih kơ ‘noh, tơdrong tơchơ̆t jei tơmơ̆t dơ̆ng rim trong ưh kơ gơh pơm nhen: iok yoa mạng, AI chih tơlĕch dôm kơtơ̆ng ang glăi ưh kơ ƀlep; tơpŭ dih băl, vei ver hơnăp jang; pơjĭp trong jang tơplih ‘nao tơchăr vă iŏk yoa sa hơpăh ăn kơ dih păng ưh tơroi rơhao mŭk drăm ŭnh hnam kơdih.