Đơ̆ng rim hơnih tĕch mơdro hmă truh hơnih tĕch mơdro điên tư păng mạng tơpôl, lơ tơmam drăm pơm thơthoi Yến sào Khánh Hòa đei tĕch mơdro kĕt keng. Ưh khan iŏk hơnăn lei lăi, rim bơngai mơdro oei pơm lei lăi kơlong păng logo vă hơlĕnh pơdăr bơngai răt. Kiơ̆ đơ̆ng Công ty Yến sào Khánh Hòa, hrei ou đei 122 hơnih mơdro sa iŏk yoa glăi hơnăn "Yến sào Khánh Hòa"; 42 hơnih mơdro sa apĭnh pơm hơnăn mơdro sa păng 55 hơnih apĭnh pơm hơnăn tơmam drăm lei lăi. Lơ̆m mạng jei hlôi ƀôh dang 280 tai khoan Facebook hăm website pơm thơthoi hơnăn.

Kiơ̆ đơ̆ng rim bơngai joăt jang, mưh tơmam drăm ya tĕch mơdro lơ, tơdrong hiong răm ưh khan lăp hơdrô̆ hơnih mơdro sa mă oei pơm kơnê̆ truh dôm bơngai rong sem pleng pơm đak yến păng rim hơnih pơm tơlĕch tơpă. Bơngai răt yoa pă gan lui gô pơm ăn tơdrong răt iŏk ưh kơ lơ, pơm kơnê̆ truh kơjă tơmam drăm păng tơdrong ‘meh vă pơih să hơnih tĕch mơdro. Ƀok Trần Kiều Hưng, Kơdră chĕp pơgơ̆r Hơnih bơ̆ jang Vei lăng tĕch mơdro dêh char Khánh Hòa tơbăt, lơ tơmam drăm pơm glăi kơpi iŏk nhen vă lei lăi găh kơdŭng, hơnăn păng đei ‘măng chih hloi hơnih pơm tơlĕch ưh kơ ƀlep tơpă vă pơm ăn bơngai răt yoa lui.“Pơm glăi lơ hloh ‘noh hơnăn “Yến sào Khánh Hòa”, ‘nou jĭ hơnăn Công ty hlôi đei teh đak vei lăng. Ou ki, nhôn ƀôh tôch kơ lơ tơmam drăm pơm glăi, pơm tơlĕch đơ̆ng tơring anai mă lei oei chih hơnăn pơm tơlĕch tơ̆ Khánh Hòa mă lei mưh năm tơchă hơnih pơm tơlech ‘noh ưh kơ đei. Lơ bơngai răt yoa mưh đe chă đŏk păng ƀôh Yến sào Khánh Hòa ‘noh đe tơchĕng truh yến sào đei pơm tơlĕch tơ̆ Khánh Hòa păng kơ Công ty Yến sào Khánh Hòa”.

Tơdrou khei blŭng sơnăm 2026, Công ty Yến sào Khánh Hòa pơm tơlĕch đei hloh 130 triu tơmam drăm, tĕch mơdro iŏk đei vă jê̆ 1.700 ti hlak jên, pơjing tơdrong jang ăn vă jê̆ 3.900 ‘nu bơngai jang. Tơdrong mă ou tơ ƀôh ăn tơmam drăm yến sào tơgop tôch kơ lơ ăn jang mŭk drăm dêh char. Vă vei lăng tơdrong đei iŏk yoa ăn bơngai pơm tơlĕch, Hơnih bơ̆ jang Vei lăng tĕch mơdro dêh char Khánh Hòa hăm Công ty Yến sào Khánh Hòa hlôi kĭ pơkăp tơdrong jang hơdoi dăr lăng hơlen tơdrong tĕch mơdro, xek phak dôm tơdrong pơm glăi pơm tơngla tơmam drăm.