Khul kơdră teh đak athei pơjao tơdrong chĕp kơ̆l pơgơ̆r mă xă ƀiơ̆ ăn Tơring kơdrâm gĭt kăl. Pơre Hla ar chih tơroi đơ̆ng Khul kơdră teh đak, Kơdră tơm jang Tư phap Hoàng Thanh Tùng pơma hơdăh, Luơ̆t atŏk tơiung tơring kơdrâm đei chih pơjing vă pơih trong chih đei tơdrong hơgăt sơđơ̆ng ‘lơ̆ng păng gơ̆h jang kiơ̆ vă jang tŏk. 

Tơdrong tơm ‘nŏh hơmet pơ ‘lơ̆ng dôm tơdrong oei tơhlăk găh trong pơgơ̆r jang, jên tơmam păng tơdrong pơgơ̆r bơ̆ jang kiơ̆; hơtŏk tơdrong klăih song hơnăp jang vă jang tŏk hrĕnh, pran kơjăp. Tơdrong chih tơlĕch Luơ̆t 'nŏh tôch gĭt kăl vă pơjing trong pơgơ̆r jang, tơdrong tơchơ̆t đơ̆ng Đảng; 'moi kiơ̆, chih hơdăh rim tơdrong hơgăt, tơdrong tơgŭm hơdrô̆ đei chih lơ̆m dôm Tơdrong tơchơ̆t đei ƀơm truh đơ̆ng Quốc hội hlôi đei jang kiơ̆ tơ̆ yăn âu.

Hrei 'nâu, plt Hồ Chí Minh păng dôm tơring kơdrâm tih oei đei lơ tơdrong tơhlăk găn trong găh tơdrong chĕng hơmet teh, tơproh trong jang, man anih jang, pơm trong nơnăm, vei lăng cham char, tơplih 'nao rơgei, pơtho hŏk pơhrăm, jang pơgang, vei sơđơ̆ng tơdrong arih, vei lăng păng tơguăt trong jang hơdoi, kăl đei 1 khôi luơ̆t sơđơ̆ng 'lơ̆ng, tôm tĕch păng pran kơjăp vă pơjing đei jơhngâm pran jang atŏk tơiung 'nao.