Vă sơkơ̆t lăng tơdrong jang kiơ̆ luơ̆t pơkăp, chih akŏm dôm tơdrong tơnap tap, tơhlăk tơhlĭn đơ̆ng tơdrong pơm jang vă 'măn ăn tơdrong chih hơmet, keh đang tơchơ̆t tơgŭm, khôi luơ̆t gah groi teh lơ̆m khei năr truh. Lơ̆m 'măng chă hơlen lăng, rim bơngai jang lơ̆m Khul tang măt ăn Kuô̆k hô̆i dêh char Đăk Lăk pơma đam, tơƀôh hơdah dôm tơdrong tơnap tap, tơhlăk tăk lơ̆m tơdrong jang kiơ̆ Luơ̆t Groi teh sơnăm 2024, mă kăl noh gah tơdrong asong hla bar pơkăp yua teh păng pơm kiơ̆ pơkăp asong tơdrong pơgơ̆r lơ̆m jơnŭm pơgơ̆r tơring 2 tăl.

Pơma ah pơtôch tơdrong hơlen, yă Lê Đào An Xuân, Phŏ Kơdră juăt jang kơ Khul tang măt Kuô̆k hô̆i dêh char Đăk Lăk akhan, lơ̆m tơdrong hơtŏk pơkăp sơnong pơgơ̆r ăn jơnŭm pơgơ̆r păng chih akŏm khôi luơ̆t kiơ̆ tơchơ̆t, Hơnih Choh jang xa păng Cham char gô pơtoi tơgŭm, kơchăng keh đang hla bar chih akŏm mă jơnŭm pơgơ̆r tơring po vei lăng vă pơm kiơ̆ Luơ̆t groi teh gơh đei jơnei, drơ̆ng minh păng trŏ ƀlep hăm tơdrong đei tơ̆ tơring.