Đơ̆ng blŭng sơnăm 2026 truh dang ei, rim pơgê năr 4 rim giĕng, Hơnih vei lăng kon pơlei tơring Hàm Tân, dêh char Lâm Đồng pơgơ̆r dơ̆ng pơgê “Mơ̆ng păng pơma dơnuh hăm kon pơlei” kơtă tơ̆ hơnih bơ̆ jang tơring. Ƀok Trương Quang Lập, oei lơ̆m tơring Hàm Tân tơbăt, trong jang ou jĭ tôch trŏ lăp, pơjing rơvơn ăn kon pơlei pơma dơnuh kơtă hăm kơdră chĕp pơgơ̆r tơring:  “Dôm hla bơar đei ƀơm truh groi teh ‘noh jei tơtok tơpă mơ̆n, mă lei gơnơm năr Puăn đei trong jang tơƀơ̆p pơma dơnuh hăm kon pơlei, ‘oh mưh năm lei đei ƀôh hloi kơdră chĕp pơgơ̆r tơ̆ noh jei chă pơtho ăn kơ nhôn pơm hla bơar lơ liơ mă trŏ lăp, mă keh đang koăng hloh”.

Găh ƀok Lê Văn Hoà hôn bơnê kơtang găh tơdrong pơvih pơvăn đơ̆ng kang ƀô̆ tơring:  "Pơma atŭm, kang ƀô̆ tơ̆ ou bơ̆ jang tôch tơnăp, mă lei kơ yuơ ‘nao tơplih ‘nao kơna oei hiơ hiơ̆ ƀiơ̆. Mă tơpă, bu jei phăl hơlăng ngăl. Ĭnh năm tơ̆ ou pơm hla bơar teh, đơ̆ng noh jei pơm dôm tơdrong đei ƀơm truh tơdrong lui khop, ba ƀôh đe kang ƀô̆ bơ̆ jang tơnăp tơpă mơ̆n".

Đơ̆ng ‘măng tơlĕch trong jang truh dang ei, khul kơdră chĕp pơgơ̆r tơring Hàm Tân hlôi pơgơ̆r sơng hơvơn hloh 320 ‘măng nơ̆r tơgop tơ iung pơjing kơdră tơring păng hơmet pơ ‘lơ̆ng hloi lơ tơdrong tơhlăk tơhlĭn kơ konpơlei lơ̆m tơdrong năm pơm hla bơar.

Ưh khan lăp hơdrô̆ Hàm Tân, pơgê năr 5 giĕng mă blŭng khei 7 ou ki, phường Phú Thuỷ jei ‘măng mă blŭng iung jang kiơ̆ trong jang "Kaphê pơgê kơ Khul kơdră chĕp pơgơ̆r phường hăm kon pơlei”. Tơdrong pơgơ̆r ou hlôi đei kon pơlei lăng truh.

Khul kơdră chĕp pơgơ̆r phường Phú Thuỷ tơbăt, tơdrong proh hơmet jơ ‘năr pơgơ̆r "Kaphê pơgê" mĭnh khei mĭnh ‘măng, tơlơh pơgơ̆r tơ̆ 12 koeng kơphô̆ lơ̆m tơring. Yă Nguyễn Thị Minh Ngọc, Kơdră chĕp pơgơ̆r Hơnih bơ̆ jang Măt trâ̆n tôh kuô̆k Việt Nam phường Phú Thuỷ pơma hơdăh, tơdrong tơm kơ trong jang ‘noh iung jang kiơ̆ kơjăp trong jang “tơjê̆ kon pơlei, tơklep hăm tơring”:  "Hăm dôm tơdrong gơh vă pơma dơnuh păng xek tơlang ăn hloi lei kơdră chĕp pơgơ̆r jei hlôi pơjao ăn rim hơnih bơ̆ jang pơma dơnuh kơtă lơ̆m jơ huch cà phê pơgê ‘noh hloi. Găh dôm tơdrong kăl vă hơlen ‘mơ̆i hla bơar vă xek tơlang ăn lei Hơnih jang măt trân chih akŏm păng pơtruh dôm tơdrong đei ƀơm truh gơh sek tơlang đơ̆ng rim hơnih bơ̆ jang vă chih akŏm păng pơrô̆ xek tơlang tơtom ăn kon pơlei".

Iŏk tơdrong lăp đon đơ̆ng kon pơlei păng hơnih mơdro sa pơm ‘long pơtŏ jang ‘lơ̆ng tŏk bŏk lang să kơtang hloh. Dôm jơ “Kaphê pơgê” dăh mă dôm năr “mơ̆ng kon pơlei pơma” tŏk bŏk tơgop hơmet pơ ‘lơ̆ng jơhngơm đon lui yom, tơ iung pơjing trong bơ̆ jang iŏk tơdrong lăp đon đơ̆ng kon pơlei pơm ‘long pơtŏ.