Truh dang ei, dêh char Lâm Đồng tơlĕch kon jên teh đak tơmơ̆t jang đei 30% trong tơlĕch jang, tŏ sĕt hloh pơtêng hăm jô̆ hơtŏ lơm teh đak ‘noh 39%, dơ̆ng mă 31 lơ̆m 34 dêh char, pơlei tơm. Tơdrong tơm pơm ăn tơlĕch kon jên teh đak tơmơ̆t jang kơ dêh char Lâm Đồng tŏ sĕt đei sơkơ̆t hơdăh găh lơ kơ yuơ tơhlăk tơhlĭn lơ̆m hrŭ ăn, iŏk tơvih teh; bơ̆ jang hơmet ăn tơmơ̆t jên jang oei hiơ hiơ̆ păng tơdrong proh hơmet kon jên tơmơ̆t jang tim mă trŏ ƀlep hăm kĕ jang kơ mĭnh ƀar hơnih vă jang. Dêh char tơlĕch ăn truh đĭ khei 9 tơlĕch kon jên jang jơnei 65% trong tơlĕch jang găh kon jên. Iung pơma tơ̆ Hop akŏm, Kơdră chĕp pơgơ̆r Hơnih vei lăng kon pơlei dêh char Lâm Đồng Hồ Văn Mười athei rim hơnih bơ̆ jang, tơring dăr lăng rim tơdrong vă jang, akom hơmet pơ ‘lơ̆ng tơnap tap, atŏk kơtang iung jang ming man păng tơlĕch kon jên tơmơ̆t jang; adoi hôn bơnê păng hơmet pơ ‘lơ̆ng hơnăp jang kơ bơngai chĕp kơ̆l.