Kơ yuơ Kơdră chĕp pơgơ̆r Kuô̆k hô̆i Trần Thanh Mẫn chĕp pơgơ̆r, năr brei (27/7) Hơnih bơ̆ jang chĕp pơgơ̆r Kuô̆k hô̆i hơnơ̆ng hop akŏm ‘măng mă 4, ăn tơgop nơ̆r găh tơdrong vă jang Tơdrong tơchơ̆t đơ̆ng Kuôk hô̆i găh tang găn hơlou, iung tơjră tang găn tơdrong glăi păng pơm glăi khôi luơ̆t, bơ̆ jang kơ Viện kiểm sát nhân dân, kơ Hơnih xek tơlang tơm păng bơ̆ jang jang kiơ̆ khôi luơ̆t, Hơnih bơ̆ jang chĕp pơgơ̆r Kuô̆k hô̆i ăn tơgop nơ̆r hăm Hla bơar pơtruh ăn đơ̆ng Khul kơdră Teh đak gah trong vă pơjing Tơdrong tơchơ̆t trong bơ̆ jang, trong jang kăl hăm tơdrong vă pơjing tơ iung pơjing tơring kơdrơ̆m bĭt iŏk đak dơsĭ tơ̆ pơlei tơm Đà Nẵng. Kiơ̆ kơ ‘noh, tơdrong vă jang hăm hơgăt teh să dang 1.500ha, kon jên tơmơ̆t jang 400.000 ti hlak jên, đei lăng truh atŏk tơ iung đei jing hơnih kơdrơ̆m bĭt iok đak dơsĭ ‘lơ̆ng hơ iă, hơtŏ lơ̆m apŭng plĕnh teh, akom jơhngơ̆m đon gơh hơgei, kon jên tơmơ̆t jang, kmăi kmŏk păng tơchăr hơgei. Tơgop pơih să cham char atŏk tơ iung, pơjing hơyak pran ‘nao kơ tơdrong jang mŭk drăm hơgei, trŏ lăp hăm tơplih ‘nao trong atŏk tơ iung teh đak lơ̆m chăl hle.