Đơ̆ng rŏng kơ tơmam mắc ca đơ̆ng Công ty TNHH Tơmam jang đei đơ̆ng teh gôh Bazan (thôn 4, xăh Nhân Cơ, dêh char Lâm Đồng) đei chih tơbăt jĭ tơmam OCOP 3 sơnglŏng sơnăm 2024, anih jang pơ̆n pơih xă tơdrong jang xa. Ưh lăp hơtŏk tơdrong răt iŏk găr mắc ca hơdrih đơ̆ng kon pơlei đĕch, công ty oei tơlĕch jên răt hơmet kơmăy ot, hơdrĕng păng pơm tơmam vă pơm hơtŏk kơjă. Sơnăm ‘nâu, plei mắc ca đei pơm hơmet ‘lơ̆ng pơhlom truh 100 tân, tŏk lơ ‘măng pơting hăm adrol sơ̆. Mă lei, kŭm hăm tơmam tŏk lơ ‘nŏh jĭ tơdrong kơhret  athei chă đei anih răt iŏk pơđĭ tơmam kơjăp ‘lơ̆ng dơ̆ng.

Yă Thân Thị Thảo, Kơdră chĕp kơ̆l anih jang tơroi, tĕch mơdro hăm điên tư jĭ trong yak đei lơ tơdrong ‘lơ̆ng mă lei anih jang kăl đei tơdrong tơgŭm dơ̆ng vă jang xa roi đei yoa: “Sơnăm ‘nâu plei mắc ca tŏk lơ đơ̆ng 2-3 ‘măng, trong tĕch nhôn oei hơnơ̆ng tĕch thoi so đĕch, tĕch kiơ̆ bơngai juăt, kiơ̆ Facebook, Zalo. ‘Mĕh tĕch tơ̆ Anih tĕch tơmam hăm điên tư ră mă lei tam mă juăt, ưh tam băt trong tăh hơmet tơmam lơ̆m tơpu, sơng hla ar đe apinh răt kơna kăl đei tơgŭm ăn.”

Đơ̆ng tơdrong ‘mĕh vă tơ̆ yăn âu jing đei ƀai toan chă trong tĕch tơmam đơ̆ng choh jang xa đei, ƀât blŭng sơnăm ‘nâu, xăh Nhân Cơ tơmât yoa Anih tĕch tơmam hăm điên tư kơtă lơ̆m Anih jang Đảng kơ xăh, kŭm hăm website nhanco.vn nhen thoi mĭnh "kơchơ kơmăy sô̆" kơ tơring. Tơ̆ âu, dôm tơ ‘ngla tơmam đei tơgŭm pơjing um up, hơnhăk tĕch tơmam, chih hơdăh anih jang đei tơmam, roi tơbăt, tĕch tơmam păng chă trong jang hơdoi vang chơ chuĕn tơmam. Gơnơm thoi noh, bơngai jang dar deh tơplih đơ̆ng tơdrong juăt tĕch ăn bơngai pơdro jing kơchăng tĕch tơpăt ăn bơngai răt păng pơjing hơnăn tơmam lơ̆m kơmăy sô̆.

Mŏ Phạm Thị Nga, tơ ‘ngla anih jang yến sào Thiên Ngọc Nga, tơ̆ thôn 10, xăh Nhân Cơ ăn tơbăt, tơdrong vang tĕch mơdro hăm kơmăy điên tư tơ̆ xăh hlôi pơih đei tơdrong ‘lơ̆ng vă tĕch tơmam ăn bơngai răt tơ̆ ‘ngoăih kơ tơring: "Iŏk đơ̆ng vang tĕch tơmam hăm kơmăy điên tư kơ xăh, tơmam yến sào đei lơ bơngai băt truh ƀiơ̆, bơngai răt đơ̆ng lơ tơring truh chă. Inh hơpơi ‘mĕh tơ̆ hơnăp kơnh ưh lăp hăm yến sào đĕch mă hăm mắc ca, cheh phe păng lơ tơmam nai tơ̆ tơring gô đei roi tơbăt truh tơ̆ lơ tơring ƀiơ̆, tĕch ăn lơ anih tĕch mơdro ƀiơ̆".

Dang ei xăh Nhân Cơ đei 8 tơmam OCOP păng oei pơm hla ar hăm 4 tơmam ‘nao dơ̆ng. Lơ̆m xăh đei 10 HTX jang xa mă lơ ‘nŏh găh tơdrong choh jang, hăm kơsô̆ jên đei kĭ pơkăp vă tơlĕch jang hlŏh 28,5 ti. ‘Nâu jĭ tơmam gĭt kăl vă tơring hơnơ̆ng atŏk tơiung tơdrong tĕch mơdro hăm kơmăy điên tư.

Kiơ̆ ƀok Vũ Trọng Tài, Phŏ Kơdră Anih jang mŭk drăm – pơm trong, man anih jang kơ xăh Nhân Cơ, đơ̆ng rŏng vă jê̆ 1 puăt sơnăm bơ̆ jang, tơdrong hơiă hlŏh ưh lăp hơdrô̆ kơsô̆ tơmam đei hơnhăk tĕch roi tŏk đĕch mă đon tơchĕng đơ̆ng dôm tơ ‘ngla jang đei tơmam kŭm tơplih kiơ̆ 'năi: "Đơ̆ng khei 2/2026 truh dang ei, anih tĕch tơmam hăm điên tư kơ xăh hlôi pơklĕm tĕch 12 tơmam đơ̆ng 8 anih jang tơ̆ tơring. Nhôn pơjing grŭp bơ̆ jang vă tơgŭm ăn kon pơlei hơnhăk tĕch tơmam, roi tơbăt, sơng iŏk hla ar apinh răt tơmam păng hơmet pơ ‘lơ̆ng website nhanco.vn vă tơdrong tĕch mơdro hăm điên tư jing jơhngâm pran vă atŏk tơiung choh jang xa tơ̆ tơring".

Anih tĕch tơmam hăm điên tư tơ̆ Nhân Cơ yoa thoi noh ưh lăp jing anih roi tơbăt tơmam jang đei đĕch mă oei chă sơng iŏk hla ar apinh răt tơmam dơ̆ng. ‘Nâu oei jing anih tơguăt trong jang đơ̆ng anih tĕch mơdro, HTX păng unh hnam jang xa dơ̆ng; anih mă dôm bơngai jang chŭn mir roi tơƀôh tơdrong juăt jang, chă bơngai jang hơdoi păng dar deh pơjing trong jang ‘nao vă atŏk tơiung anih tĕch mơdro.

Ƀok Phan Anh Tuấn, Bí thư Đảng xăh Nhân Cơ akhan, đei yoa tih hlŏh đơ̆ng trong jang ‘nâu ưh đei tơ̆ lăm kơsô̆ hla ar apinh răt tơmam kơplăh dang ei ôh, mă ‘nŏh jĭ tơdrong pơjing đei 1 anih vă tơguăt hơdai tơdrong jang xa hăm tĕch mơdro tơmam đơ̆ng choh jang đei kơtă tơ̆ tơring hloi: “Tơdrong đei yoa blŭng a ưh lăp tĕch đei tơmam đĕch mă sư pơjing đei anih vă dôm anih jang xa, HTX tơƀâp, tơguăt trong jang hơdai, roi tơbăt tơmam jang đei. Nhôn ‘mĕh roi đunh roi đei lơ tơmam đơ̆ng Nhân Cơ păng dôm tơring jŭm dăr đei hơnhăk tĕch tơ̆ âu, vă roi đei lơ bơngai băt truh dôm tơmam ‘lơ̆ng đơ̆ng tơring teh âu, tơdrong pran ‘lơ̆ng đơ̆ng xăh kŭm đei tŏk kiơ̆”.

Đơ̆ng mĭnh "kơchơ kơmăy sô̆" tơ̆ xăh, Nhân Cơ oei pơih đei 1 trong jang ‘nao vă atŏk tơiung choh jang xa păng pơjing tơring tơrang ‘nao. Ưh lăp tơgŭm ăn tơmam đơ̆ng choh jang xa đei pơih xă trong tĕch tơmam đĕch, mă trong jang ‘nâu oei tơgop pơm tơplih đon tơchĕng găh tơdrong jang xa, tĕch mơdro đơ̆ng kon pơlei păng anih jang dơ̆ng, atŭm hăm ‘nŏh tơƀôh hơdăh hơnăp jang vang yak hơdoi đơ̆ng khul kơdră tơring lơ̆m tơdrong tơplih hăm kơmăy sô̆. ‘Nŏh kŭm jing tơdrong tơƀôh hơdăh đon pơhnŏng hơnhăk Tơdrong tơchơ̆t kơsô̆ 57-NQ/TW đơ̆ng Anih tơm Chinh trĭ mât lơ̆m tơdrong arih xa hăm lơ tơdrong jang rơđăh ‘lơ̆ng, dar deh pơjing trong jang mŭk drăm hăm kơmăy sô̆ păng jang tŏk kơtă tơ̆ pơlei pơla đei tơring teh gôh bazan Nhân Cơ, dêh char Lâm Đồng./.