Mơmat tat tih hloh hrei ‘nâu oei tơ̆ tơdrong sơng iŏk păng gơ̆t jơ̆ng ƀak si tơ̆ dôm tơring hơtăih hơtŏ, tơring kon pơlei kon kông yua trong jang tơgŭm tam mă kĕ pran păng tơdrong bơ̆jang oei tam mă ‘lơ̆ng. Lơ̆m dêh char đei 135 hnam pơgang xăh hăm 369 hnam pơgang tơring. Mă đơ̆ng 100% hnam pơgang xăh hlôi đei ƀak si bơ̆jang, mă lei tơpă yan âu dêh char oei tŏk bŏk ưh kơ măh vă jê̆ 500 ‘nu bơngai jang. Hơdai hăm ‘noh, tơdrong jang khŭl kơdră 2 tăl pơm ăn Anih vei lăng kon pơlei tơ̆ xăh oei pơĭnh lơ̆m vei lăng joăt jang, ưh kơ đei hlôh vao yan âu lơ̆m tơchă bơngai răt pơgang kŭm nhen bơ̆jang hnam pơgang xăh nhen 1 anih jang hơdrô̆.

Tơ̆ hơnăp tơdrong ‘nâu, tơ̆ jơ bơ̆jang ‘nao âu hăm Khŭl dăr hơlen tơdrong jang kơ Anih jang pơvih pơvăn ăn kon pơlei kơ Quốc hội, Anih vei lăng kon pơlei dêh char Gia Lai hlôi athei Trung ương jăh tơlĕch trong pơtho drơ̆ng 1 nơ̆r găh hơnih bơ̆jang, hơgăt kơsô̆ bơngai jang kiơ̆ tơdrong hơgăt kơsô̆ kon pơlei păng tơring; hơdai hăm tơgŭm jên tơmơ̆t jang hrơ̆ch anih jang kăl, tơmam ăn jang pơgang tơring. Tơroi rơđăh tơdrong kŭm hăm tơchĕng bơngơ̆t đơ̆ng tơring, yă Nguyễn Thị Thanh Lịch, Phŏ Kơdră Anih vei lăng kon pơlei dêh char Gia Lai tơroi:

“Dêh char tơlĕch ăn lơ trong jang tơgŭm găh sơng iŏk mă lei ưh kơ đei ƀak si năm jang. Năm jang tơ̆ anih jang pơgang, năm jang tơ̆ hnam pơgang đĭ mơmat bơih, oei năm jang tơ̆ xăh ‘noh đe sư ưh kơ năm. Hrei ‘nâu, kơsô̆ jên tơgŭm bơngai jang lơ hloh đơ̆ng nhôn ‘noh  600 triệu hlak jên ăn kơ 1 ‘nu ƀak si păng tơgŭm jên thuê hnam. Yua kơ tơdăh ăn năm jang mă ưh kơ đei tơmam, ưh kơ đei bơ̆jang ‘noh brăh brư bơngai jang, ƀơ̆t mă tơ̆ hnam pơgang kơpal, nhôn tŏk bŏk ưh kơ măh lơ”.

Bơnê kơ tơdrong tơroi tơpăt đơ̆ng dêh char Gia Lai lơ̆m chă hơlen ƀôh băt dôm tơdrong oei đei, Khŭl jang dăr hơlen sơkơ̆t hơdah Gia Lai jĭ minh lơ̆m dôm tơring yok hơlou lơ̆m tơdrong pơtơm dôm tơchơ̆t vă hơvơn đe ƀak si truh jang. Mă lei, Khŭl adoi pơtruh nơ̆r hăm dêh char, athei hơtŏk 'lơ̆ng hơnih pơm jang, chih akŏm tơchơ̆t hơtŏk sơnong pơyua păng pơtho hŏk đơ̆ng rŏng kơ đăi hŏk, vă đe ƀak si sơđơ̆ng tơguăt pơm jang đunh sơnăm. Yă Trần Thị Nhị Hà, Phŏ Kơdră Hơnih jang Pơvih pơvăn ăn kon pơlei kơ Kuô̆k hô̆i, Kơdră khŭl dăr hơlen ră hơdah:

“Gia Lai kăl đei trong pơkăp jang kiơ, tơchơ̆t tơgŭm thoi yơ gơh pran vă hơmet dôm tơdrong tơnap tap, dêh char dah pơtruh nơ̆r. Khul jang hơlen gô hơlen lăng tôm păng trŏ vă atŭm băl pơklaih tơnap tap. Tôm tơdrong jang 'noh hue lăng truh kon pơlei, pơm thoi yơ vă kon pơlei tơpă gơh đei yua đơ̆ng dôm tơchơ̆t mă đe kơdră Đảng, Teh đak tŏk bŏk oei hơpơi 'meh đei”.

Tơdrong yak hơdoi păng chă mơ̆ng đơ̆ng Kuô̆k gô jing trong kăp gĭt vă Gia Lai brư̆ brư̆ pơklaih "hơnih tơhlăk" gah bơngai jang, hơmet tơdrong jang pơgang tơ̆ tơring, pơtrŏ hăm tơdrong hơpơi 'meh đơ̆ng kon pơlei tơ̆ tơring Tây Nguyên.