Pơma pơtôch jơ bơ̆jang, Tổng Bí thư, Kơdră chĕpo pơgơ̆r teh đak athei, kăl tĕnh koăng pơm pơkeh Trong vă jang hơmet ming Grup jang jăl jang 2026 - 2030 kiơ̆ trong trŏ lăp hloh, ‘lơ̆ng hloh; Tơdrong vă jang kăl lăng kơjăp kiơ̆ Tơdrong tơchơ̆t 19, Tơdrong tơchơ̆t 57, rim trong pơprŏ jang yuh soh, tơmam drăm lơ̆m teh păng athei kăl tơplih rơgoh ‘lơ̆ng; pơm hơdăh trong vă jang, hơnăp jang, tơdrong jơnei đei lăng kiơ̆ jang iok đei, kon jên jang jơnei păng bơ̆ jang kmăi kmŏk hơgei, khul kơdră chĕp pơgơ̆r kơtoei păng kĕ pơjei. Tổng Bí thư, Kơdră chĕp pơgơ̆r teh đak athei, Grup jang kăl pơjing đei hơyak pran găh khoa hŏk kmăi kmŏk, tơplih kơsô̆ păng jang pơm tơlĕch đei lơ; adoi proh hơmet dơ̆ng rim tơdrong tơmơ̆t jên jang păng jên jang, atŏk kơtang pơih să jang hơdoi atok tơ iung, pơm hơtŏk kĕ chĕp pơgơ̆r, rim tơdrong vă jang kăl lăng kơjăp păng đei rơih mă hơlen, ưh kơ druh kiơ̆ đei lơ, ưh kơ tơmơ̆t jên jang lơ tơdrong ou to. Lăng tơdrong sơđơ̆ng păng hơrih sa kơ bơngai jang ‘noh kăl hloh tơklep hăm iung jang iŏk dôm tơdrong đei, hơmet ming hơ ‘lơ̆ng cham char, atŏk tơ iung kơjăp ‘lơ̆ng kơ tơring. Atŭm hăm ‘noh, kăl lăng tông nông gia găh hnam oei, jang pơgang păng dôm tơdrong tơgum djru găh bơ̆ jang, atŏk kơtang jang hăm gre kmăi kmŏk vă pơm dă ƀiơ̆ jang hăm jơ̆ng ti tơ̆ rim hơnih jang gleh hrat, hơmơt tơt.