Đơ̆ng rŏng lơ sơnăm tơ chă, kơting linh lôch tang ăn teh đak Y Chông Triêk hlôi đei dônh akŏm păng ƀŭ pơdong tơ̆ Pơsat ƀŭ linh lôch tang ăn teh đak xăh Liên Sơn Lắk, dêh char Đắk Lắk ƀlep ƀơ̆t ‘năr 27/7 sơnăm ‘nâu. ‘Noh jĭ jơnei đơ̆ng Tơdrong vih dơ̆ng đơ̆ng rŏng hloh 1 puăt anglŏ lôch hơchăng ưh kơ khan lăp jang đang jơhngơ̆m đon ‘meh vă đơ̆ng bôl buăl mă oei tơgŭm unh hnam hơi jơhngơ̆m chang gô. Mŏ H'Wai Triêk, oh drŏ kăn linh lôch tang ăn teh đak, tơbăt đơ̆ng dang ei, năr Linh jĭ rơka - Linh lôch tang ăn teh đak 27/7 rim sơnăm gô jing năr et ƀlep kơ năr ‘nhŏng sư lôch.

 "Tơdrong jang tơchă ‘nhŏng đơ̆ng nhôn dang ei đĭ pơdơh bơih, hơđơ̆ng jơhngơ̆m mưh ƀlep năr sư lôch - têt ‘noh kon hơ ‘lơ̆p đĭ băt pơsat ƀŭ, băt hơnih pơsat đei hơnăn Y Chông Triêk ‘noh ‘lơ̆ng bơih”.

Tơdrong pơlung jơhngơ̆m kơ unh hnam mŏ H'Wai Triêk ‘noh jĭ tơdrong pơtôch ‘lơ̆ng đơ̆ng 1 ‘măng tơchă pơdui đunh hloh 1 puăt anglŏ, mă kăl ‘noh jĭ “Tơdrong jang 500 măng năr”.

Yă Võ Thị Hồng, tơ̆ phường Ea Kao, dêh char Đắk Lắk đei ‘nhŏng drŏ nglo lôch tơ̆ hơnih tơblăh B2 sơnăm 1972. Lơ sơnăm âu ki, bơ̆n oh, bơ̆n kon, bơ̆n mon hlôi lơ ‘măng tơchă. Đĭ Tây Ninh ‘noh trŭh tơ̆ dôm dêh char tơring Pơmơ̆t, đang kơ ‘noh brŏk hoh đĕch. Bơ̆jang kiơ̆ “Tơdrong jang 500 măng năr”, yă hlôi pơtruh kơmâu ADN đơ̆ng sư, hăm đon lui akhan gô đei năr tơchă đei ‘nhŏng.

"Lơ sơnăm ăn đe mon năm tơchă đĭ đăng dôm pơsat tơ̆ tơring Tây Ninh, dang ei ‘măng âu năm iŏk kơmâu ADN inh hơmĕng dêh. Inh kơtơ̆ng tơroi tơ̆ tơring Pơmơ̆t tơchă đei lơ kơting linh lôch tang ăn teh đak kơna tôch kơ lui, mă đơ̆ng hrôih dăh mă klui inh kŭm hơmĕng tơchă đei”.

Lei lăi thoi noh mơ̆n, ƀok Phan Đức Nhuận, tơ̆ phường Thành Nhất, kŭm hlôi lơ ‘măng năm tơ̆ dôm dêh char păih Pơmơ̆t tơchă oh drŏ nglo ‘noh linh lôch tang ăn teh đak Phan Đức Thắng. Đei ‘măng lăp yua kơ ƀôh lơ̆m mạng tơpôl đei ƀôh 1 pôm pơsat hơnăn lei lăi, sư năm hloi. Hơmĕng bơih ‘noh ưh kơ đei dơ̆ng. Mă lei ‘măng ‘nâu ‘noh pha bơih. Ƀok lui khoa hŏk gô tơgŭm dôm bơngai oei hơrih jang đei tơdrong hơpơi ‘meh hăm bơngai đĭ lôch.

"Dang ei mĕ ƀă lôch đĭ bơih, đe ‘nhŏng đe mŏ kŭm kră dêh bơih. Trong jang âu pơm ăn kon pơlei păng inh tôch kơ ƀrơ̆k jơhngơ̆m. ‘Nâu lăng nhen jing ‘măng tơblăh tuch luch lơ̆m tơdrong tơchă linh lôch tang ăn teh đak. ‘Măng âu đei hơmĕng yua kơ yak mơ̆t lơ̆m kơmăy kơmŏk tơm”.

Lơ̆m “Tơdrong jang 500 măng năr”, dêh char Đắk Lắk tơlĕch ăn tơdrong hơgăt dônh akŏm 270 kơting lôch tang ăn teh đak. Hơdrô̆ sơnăm 2026 hơdrin sir kôch tơchă 180 kơting linh lôch tang ăn teh đak; hơdai hăm jang đang tơdrong iŏk kơmâu ADN hăm 4.019 tŏ pơsat tam mă băt đei hơnăn tơ̆ 33 pơsat ƀŭ.

Đơ̆ng rŏng dôm tơdrong hơgăt ‘noh jĭ rơbâu tơdrong kơtơ̆ng ang đei hơlen lăng, rơbâu ‘măng năm tơ̆ rim xăh păng rơbâu tŏ pơsat đei pơ ‘lơ̆ng pơih ăn. Đại tá Ksor Lành, Phŏ Chính ủy Anih tơm pơgơ̆r Khŭl linh dêh char Đắk Lắk tơbăt, Anih tơm pơgơ̆r khŭl linh tŏk bŏk hơvơn khŭl linh jang hơgei hloh. Khŭl K51 đei klăih song jing 8 khŭl kơtă năm tơ̆ tơring, jang hơdai hăm khŭl kơdră tơring dăr hơlen, băt hơdăh, sir tơchă păng dônh akŏm kơting linh lôch tang ăn teh đak; hơdai hăm pơjing 6 khŭl joăt jang vang iŏk kơmâu tơmam tơ̆ dôm pơsat vă pơyua ăn hơlen lăng ADN. Hơdai hăm ‘noh jĭ tơdrong jang hơdai đơ̆ng khŭl linh kŏng an lơ̆m iŏk kơmâu ADN unh hnam linh lôch tang ăn teh đak păng anih jang Nội vụ lơ̆m dăr hơlen, chih hơmet ‘lơ̆ng hla ar chih răk pơsat, lŏk linh lôch tang ăn teh đak.

“Hrei ‘nâu nhôn đĭ đei hloh 6 rơbâu nơ̆r tơroi găh lĭnh lôch tang ăn teh đak. Nhôn hlôi chih hơmet kơthơ vă gơih ăn dôm khŭl jang, rim bơngai păng nhôn kŭm pơm kơ phiê̆u hơlen lăng nơ̆r tơroi kơ linh lôch tang ăn teh đak hăm mã QR, kiơ̆ đơ̆ng mã âu, dôm bơngai băt găh kơtơ̆ng ang kơ ting linh lôch tang ăn teh đak gô chih dôm tơdrong kơtơ̆ng ang lơ̆m noh păng kơtĭt nut gơih ‘noh sư gô chih tơmơ̆t lơ̆m kơmăy tơm kơ đơ̆ng Anih tơm pơgơ̆r khŭl linh dêh char. ‘Moi kiơ̆ trong jang âu, tơdrong pơgơ̆r dônh akŏm tơ̆ hơnăp kơnh gô đei yua hloh”.

Tơdrong jang 500 măng năr tơ̆ Đắk Lắk hlôi iŏk đei dôm jơnei blŭng a lơ̆m sơnăm 2026: dônh akŏm đei 19 kơting linh lôch tang ăn teh đak, lơ̆m noh đei 12 kơting linh lôch tang ăn teh đak tơ̆ Campuchia păng 7 kơting lơ̆m dêh char. Hloh 500 kơmâu tơmam hlôi iŏk vă pơyua ăn hơlen lăng ADN. Ƀok Đào Mỹ, Phŏ Kơdră Anih vei lăng kon pơlei, Phŏ kơdră Khŭl jang, Anih pơgơ̆r jang “Tơdrong jang 500 măng năr sir tơchă, dônh akŏm păng set hơlen hơdăh hơnăn linh lôch tang ăn teh đak” dêh char Đắk Lắk, pơma hơdăh, mă đơ̆ng tơdrong jang roi năr roi mơmat tat yua kơ khei ‘năr đĭ đunh dêh bơih, mă lei dêh char gô hơvơn rim khŭl jang, rim tơmam păng rim tơdrong kơtơ̆ng ang vă hơnơ̆ng tơchă dôm linh lôch tang ăn teh đak oei tam mă chă băt.

"Nhôn hơvơn pơđĭ hloi khŭl jang chinh trĭ mơ̆t jang, hăm rim trong iŏk đei lơ kơtơ̆ng ang, lăng kiơ̆ tơring, iŏk yua rim tơmam vă tơchă khŏm đei kơting linh lôch tang ăn teh đak oei ƀŭ tơ̆ hơla teh”.

Minh kơting linh lôch tang ăn teh đak đei tơchă ƀôh ‘noh thim 1 unh hnam dă ƀiơ̆ chang mang răp gô, thim 1 nơ̆r pơkă hăm dôm bơngai đĭ lôch đei bơ̆jang kiơ̆ ‘lơ̆ng. “Tơdrong jang 500 măng năr” ưh khan lăp tơdrong jang tơchă hăm hla ar hô sơ, đon blŏk păng kơmăy kơmŏk ADN, mă oei jing tơdrong jang đơ̆ng tơdrong ‘mêm, tơdrong bơ̆jang tơnăp păng jơhngơ̆m đon băt bơnê.