Tơ̆ hơnih jang pơm hla bar hanh chĭnh kŏng xah Ia Hrung, dêh char Gia Lai, rim năr, pơmai Phạm Thị Thủy, jang lơ̆m Hơnih jang Mŭk drăm sơng iŏk hloh 10 ƀô̆ hô sơ hla bar groi teh. Hơdrol ki, lơ jơ năr pơmai 'măn đŏk hơlen rim kơluăi hla bar, pơtêng hăm tơchơ̆t khôi luơ̆t. Đơ̆ng mă đei kơmăi tơchăr hơgei AI tơgŭm, pơmai hơtŏk hô sơ lơ̆m kơmăi, noh kơmăi phĭn hơlen, akŏm păng tơƀôh hloi dôm tơdrong kăl kơ băt dah mă hla bar oei kơƀah yă kiơ. Kơyuơ noh, tơdrong jang kơ pơmai dang ei lơ hloh kơ hơdrol ki: "Ƀơ̆t tam mă đei AI tơgŭm, minh năr đŏk lăng đei pơhlom 4 truh 5 ƀô̆ hô sơ. Đơ̆ng rŏng kơ yua AI hơlen lăng hô sơ, kơsô̆ ou tŏk pơhlom đơ̆ng 15 truh 20 ƀô̆. Tơring teh noh să, noh tơdrong hơlen lăng hô sơ vă pơm hla bơ-ar 'noh kăl tơpă. Kơplah 'noh, inh akŏm lơ̆m tơdrong dăr lăng gah tơm a păng khei năr pơtơm iŏk yua teh"

Ia Hrung jĭ minh lơ̆m dôm tơring đei lơ hô sơ kăl kơ pơm kơ dêh char Gia Lai. Lơ̆m 6 khei blŭng sơnăm 2026, Hơnih jang Hanh chĭnh kŏng kơ xah hlôi iŏk đei jê̆ 4.800 hô sơ. Đei khei, xah Ia Hrung ƀơm jou kơlih kơsô̆ hô sơ pơm klui đunh keh đang. Mă lei, đơ̆ng rŏng 2 khei iŏk yua AI, tơdrong jang hlôi tơplih hơđah. Kơsô̆ hô sơ pơm adar tơjur truh 62% - lơ hloh lơ̆m jơ̆p dêh char. Xah Ia Hrung jĭ minh lơ̆m 10 xah, phương đei Hơnih jang vei lăng kon pơlei dêh char Gia Lai pôk bơnê kơlih iŏk yua AI groi teh hơbĕch hloh. Yă Huỳnh Ngô Tùng Điệp, Phŏ Kơdră Hơnih jang vei lăng kon pơlei xah Ia Hrung ăn tơbăt:  "Tơdrong iŏk yua AI 'noh gơnơm tih tên lơ̆m tơdrong yua dữ liệu păng tơdrong juăt jang. Hơnih jang vei lăng kon pơlei xah adoi pơtho đe kang ƀô̆, bơngai jang iŏk yua tơnăp gah kơmăi kơmŏk ou. Mă lei, tôm 'noh athei dăr lăng mă kơchăng; sơnong jang mă hơtuch luch noh hăm đe kang ƀô̆ tơgŭm jang păng khŭl pơm hla bơ-ar hanh chĭnh"

Đơ̆ng rŏng kơ pơm kiơ̆ tơdrong pơkăp hơgrop hơnih jang hanh chĭnh, kơsô̆ hô sơ gah teh tơ̆ xah kơ Gia Lai tŏk lơ lơ̆m kơplah bơngai jang ưh đei tôm. Đơ̆ng tơdrong pơgơ̆r jang đơ̆ng Kơdră Hơnih jang vei lăng kon pơlei dêh char Gia Lai, Hơnih jang hanh chĭnh kŏng dêh char hlôi jang atŭm hăm Hơnih jang Chih măt pơm hla bar groi teh kơtă iŏk yua kơmăi AI groi teh. Lơ̆m lơ khei, khul jang gah kŏng ngê̆ thŏng tin păng đe kang ƀô̆ juăt jang atŭm "pơhrăm" AI lơ̆m kơmăi pơkăp ChatGPT hăm pơkăp hla bar khôi luơ̆t, trong pơm jang păng kơ rơbou hô sơ gah teh hlôi đei pơm keh đang.

Blŭng khei 6/2026, kơmăi ou pơtơm đei tơmơ̆t yua păng dang ei hlôi pơtruh ăn 135 xah, phương lơ̆m jơ̆p dêh char, tơgŭm pơm keh đang pơhlom 80% hla bar hanh chĭnh gah teh. Dôm tơdrong jangd dei jơnei mă blŭng tơ̆ Gia Lai ăn ƀôh, kơ̆l 'ngok tơchăr hơgei AI ưh gơh pơtăl kang ƀô̆, mă hăp jing kơmăi kơmŏk vă đe kang ƀô̆ pơm jang đei yua hiôk hian hloh. Đơ̆ng minh tơmam drăm vă pơm hla bar hô sơ groi teh, tơdrong yua AI kơyuơ Gia Lai kơdih chih akŏm tŏk bŏk oei pơih trong jang 'nao lơ̆m hơmet 'lơ̆ng trong jang hanh chĭnh, tơgop hơtŏk 'lơ̆ng ăn tơdrong jang pơvih ăn kon pơlei păng hơnih jang mŭk drăm tơ̆ tơring.