Jô̆ truh ‘năr 28/7, dêh char Lâm Đồng hlôi hơmet pơ ‘lơ̆ng 116/365 tơdrong jang oei đei, pơm tơdrong ‘lơ̆ng pơtrŭt hơtŏk tơiung mŭk drăm - tơpôl. Lơ̆m noh, 31 tơdrong jang hlôi jang đang păng tơmơ̆t lơ̆m bơ̆jang; 24 tơdrong jang hlôi iŏk pơ dreo; pơtôch tơdrong jang dăh mă tơlĕch đơ̆ng hơnih răp hơlen; 61 tơdrong jang đei pơgơ̆r ming dơ̆ng dăh mă tŏk bŏk pơm hơmet hla ar bơ̆jang vă hơnơ̆ng tơlĕch jang. Dôm tơdrong jang hlôi hơmet pơ ‘lơ̆ng đei teh să hloh 8.700 hek tar, hăm akŏm jên tơmơ̆t jang vă jê̆ 25.800 ti hlak jên.

Hăm 249 tơdrong jang oei tơhlăk tơhlĭn, dêh char Lâm Đồng klăh song jing lơ grŭp vă akŏm hơmet pơ 'lơ̆ng, đei dôm tơdrong jang găh hơnăp jang Trung ương, hơnăp jang tơring; tơdrong jang ƀơm truh tơdrong chĕng hơmet teh; tơdrong jang ƀơm truh dôm tơdrong tơchơ̆t, tơdrong hơgăt 'nao; dôm tơdrong jang tơhlăk găh tơmơ̆t jên jang, teh, ming man … Hăm dôm tơdrong jang găh hơnăp jang tơring, dôm anih jang kơpal, anih jang tơtĕnh dăr hơlen, hơlen lăng mă hơdăh rim tơdrong jang vă đei trong hơmet pơ 'lơ̆ng mă lăp.