Tơ̆ Hà Nội ‘nao pơgơ̆r Hop akŏm jang tơbôl ‘măng mă 33 hăm hơnăn “Atŏk tơiung hơnăp jang năm hơdrol păng bơ̆ jang tơdrong jang gĭt kăl, hơnơ̆ng mưh jang tơbôl đơ̆ng Việt Nam lơ̆m chăl ‘nao”. Pơma tơ̆ hop akŏm, Tổng Bí thư, Kơdră teh đak Tô Lâm pơma hơdăh, jang tơbôl athei pơma nuh mă rơđăh, pơm hơtŏk hơnăp jang năm hơdrol lơ̆m tơdrong vei lăng rơngei, vei sơđơ̆ng păng tơgĕch iŏk tôch ai tơdrong ‘lơ̆ng đơ̆ng ‘ngoăih ăn tơdrong jang tŏk kơ teh đak.

Tổng Bí thư, Kơdră teh đak athei anih jang tơbôl kơchăng, jang hơdoi tơgĕch iŏk dôm tơdrong ‘lơ̆ng, tơdra hơdrol mă trŏ rim tơdrong vă tơtom roi tơbăt ăn Đảng păng teh đak. Tơdrong jang tơbôl athei tơklep kơjăp hăm vei sơđơ̆ng teh đak păng jang mŭk drăm, pơjing đei jơhngâm pran vă pơyoa ăn tơdrong jang vei lăng teh đak đơ̆ng hrôih, đơ̆ng hơtăih. Găh noh dơ̆ng, ƀok athei hơnơ̆ng pơm hơtŏk tơdrong đei yoa đơ̆ng jang tơbôl lơ pang, kơchăng vang tơgop roi ‘lơ̆ng ăn tơring păng lơ̆m apŭng plenh teh. Tơdrong hơtŏk đon rơgei, gơ̆h jang ăn khul kăn ƀô̆ jang tơbôl "rơgei hai, tơnăp hai" kŭm jing tơdrong tơm vă pơm lăp hăm nơ̆r athei pơm hơtŏk anih dơ̆ng, bưng ai đơ̆ng Việt Nam lơ̆m apŭng plenh teh lơ̆m chăl ‘nao hrei ‘nâu.