Mă hơdăh, kăl sơđơ̆ng trong bơ̆ jang, khôi luơ̆t lăng kơjăp lơ̆m yan ou, yak hơdrol pơchoh trong ăn atŏk tơ iung, lăng kon pơlei hăm hơnih mơdro sa jĭ tơm hloh, lăng jang ‘lơ̆ng, jơnei bơ̆ jang khôi luơ̆t pơm ‘long pơtŏ tơdrong bơ̆ jang pơjing khôi luơ̆t. Kơdră chĕp pơgơ̆r Kuô̆k hô̆i pơma hơdăh, ‘măng hop akŏm tơbăt hơdăh tơdrong hơdrin đĭ ai đơ̆ng Kuô̆k hô̆i, Khul kơdră chĕp pơgơ̆r Teh đak păng rim hơnih bơ̆ jang lơ̆m tơdrong tơtom tơlĕch jang kiơ̆ ‘lơng trong bơ̆ jang đơ̆ng Đảng, trŏ lăp hăm tơdrong ‘meh vă atŏk tơ iung teh đak, ưh kơ lê̆ hiơ̆ hyĭn, pơm klui jơ ‘năr. Kơdră chĕp pơgơ̆r Kuô̆k hô̆i athei rim bơngai tang măt chă hơlen mă brĕ dôm hla bơar, hơnơ̆ng hơlen, tơgop nơ̆r hăm dôm tơdrong oei đei nơ̆r tơgop phara dih băl, mă kăl dôm tơdrong đei ƀơm truh kon pơlei păng hơnih mơdro sa; adoi athei rim trong vă pơjing khôi luơ̆t, tơdrong tơchơ̆t kăl đei hơmet ăn mă brĕ, hơlen tôm tong tơdrong đei ƀơm truh păng hơvơn tôm tong jơhngơ̆m đon gơh hơgei đơ̆ng rim bơngai joăt jang, bơngai khoa hŏk, tơpôl khul mơdro sa vă pơm hơtŏk ‘lơ̆ng tơ iung pơjing khôi luơ̆t.