Hơdrol kơ hop akŏm ưh đei pơkăp 'măng mă Mônh, Kuô̆k hô̆i jăl 16, Khul tang măt Kuô̆k hô̆i dêh char Đăk Lăk hlôi pơgơ̆r hop akŏm iŏk nơ̆r tơgop hăm dôm tơdrong chih akŏm luơ̆t vă pơtruh ăn Kuô̆k hô̆i hơlen lăng.

Minh lơ̆m dôm tơdrong đei tơrĕk hloh noh chih hơmet minh ƀar tơdrong gah Luơ̆t Tang găn păng tơjră ôp pơ-'lơ̆ng jên. Hăm tơdrong pơm glăi iŏk yua kơmăi kơmŏk hơgei păng kơmăi kơsô̆ roi năr roi lang să, lơ nơ̆r tơgop athei hơmet tơdrong tơroi tơbăt đơ̆ng rim hơnih jang tơm vă băt hơdah bơngai yua, sơkơ̆t hơdah tơdrong ưh kơ 'lơ̆ng hăm kơsô̆ jên đei păng tang găn tơtom dôm tơdrong pơm glăi. Ƀok Võ Quang Duy, tang măt ăn Hơnih jang Kanh sat hơlen tơdrong glăi Kŏng an dêh char Đăk Lăk pơtruh nơ̆r: "Dang ei, tơdrong yoch gah ôp pơ-'lơ̆ng jên hăm mŭk drăm kơsô̆ păng pơhlŭ pơhlôm iŏk yua kơmăi kơsô̆ vă ôn jên pơm glăi 'noh lang să tôch tenh. Mưh rim hơnih jang tơm hơdrô̆ pơm jang kiơ̆ trong pơtruh hla bơ-ar nhen so sơ̆ noh jên kơnê̆ gô đei pơtruh ăn lơ tai khuan nai, pơm tơnap tap ăn tơdrong dăr hơlen păng tang găn tơdrong pơm yoch glăi. Kơyuơ noh, athei đei tơdrong dăr lăng tơnăp đơ̆ng rim tai khuan vă bơ̆n chă hơlen băt păng tang găn kon jên kơnê̆"

Ƀôh hơdah, ou jĭ tơdrong tơm đei đơ̆ng tơdrong jang tang găn păng tơjră tơdrong pơm yoch glăi, tơgop keh đang chih akŏm khôi luơ̆t vă rim hơnih jang kơpal kơchăng hloh lơ̆m tơdrong vei sơđơ̆ng jên hu su kăk păng tơdrong pơyua ăn kon pơlei. Hăm tơdrong chih hơmet minh ƀar tơdrong gah Luơ̆t Pơkăp chĭl 'mong kơ Teh đak, lơ bơngai tang măt athei hơlen mă hơdah dôm tơchơ̆t gah khei năr tơchơ̆t chĭl 'mong mưh rim pang pơhnŏng pơm đunh khei năr dăr hơlen păng pơma đam. Yă Phan Thị Hoa, Kơ-iĕng Kơdră Hơnih jang Tư phap dêh char Đăk Lăk pơtruh nơ̆r: "Hơnih jang chih akŏm athei hơlen lăng mă hơdah khei năr pơkăp chĭl 'mong mưh rim pang pơdrơ̆ng dih băl gah khei năr hơlen lăng; pơma đam; dah mă hơlen lăng tơroi tơbăt khei năr pơtôch sek tơlang vă pơm trong ƀônh ăn bơngai athei chĭl 'mong lơ̆m tơdrong tơkêng, tơhlou, adoi nhen vei sơđơ̆ng tơdrong pơdrơ̆ng lơ̆m tơdrong iŏk yua khôi luơ̆t"

Dôm nơ̆r tơgop ou adoi pơkăp truh tơdrong vei lăng 'lơ̆ng hloh sơnong păng tơdrong pơyua trŏ ƀlep ăn kon pơlei, atŭm hăm noh pơm ăn dôm tơdrong tơchơ̆t đơ̆ng khôi luơ̆t hơdah hloh lơ̆m tơdrong iŏk yua.

Tơdrong tơgăl kơ băt noh rim nơ̆r tơdrong tơgop adoi đei đơ̆ng tơdrong jang, tơroi kơ dôm tơdrong tơnap tap, tơhlăk tơhlĭn lơ̆m tơdrong iŏk yua khôi luơ̆t. 'Nou adoi jing tơdrong hơdah ăn ƀôh chih akŏm khôi luơ̆t hơnơ̆ng đei lơ tơdrong hơlen lăng, tơnăp đơ̆ng rim jăl jang, rim hơnih jang păng kon pơlei tah hla.

Dôm nơ̆r tơgop kăp gĭt đei chih akŏm đơ̆ng tơdrong jang 'năr ou, gô pơtoi đei Khul tang măt ăn Kuô̆k hô̆i dêh char Đăk Lăk hơlen lăng, chih akŏm, pơm trong akŏm pơma đam lơ̆m hop akŏm. Noh adoi jing trong vă rim khôi luơ̆t ah đei tơchơ̆t tơlĕch tơpă akŏm trong jang đơ̆ng Đảng, tơdrong lăp đơ̆ng kon pơlei, pơtrŏ hăm tơchơ̆t tơ-iung pơjing Teh đak kiơ̆ chăl xã hội chủ nghĩa păng pơvih pơvăn roi năr roi 'lơ̆ng hloh, pơyua trŏ ƀlep ăn kon pơlei.