Sơkơ̆t hơdah tơdrong jang đei jơnei lơ̆m 7 khei kơ ou, Thủ tướng pơgơ̆r hăm rim bơngai jang lơ̆m Jơnŭm pơgơ̆r teh đak kiơ̆ kơ tơdrong đei păng hla bar chih tơroi đơ̆ng Hơnih tơm Jên hu, Hơnih jang kơ Jơnŭm pơgơ̆r teh đak vă sơkơ̆t hơdah dôm tơdrong jang đei jơnei. Minh lơ̆m dôm tơdrong jang tơm tih hloh đei Thủ tướng pơgơ̆r ah 'măng hop akŏm noh keh đang trong jang kiơ̆ dôm tơchơ̆t tơlĕch.

Kiơ̆ kơ noh, hơtŏk tenh keh đang chih akŏm khôi luơ̆t, tơdrong tơchơ̆t vă pơtruh ăn Kuô̆k hô̆i; tơtenh tơbang dôm hla bar pơm jang kiơ̆ luơ̆t tơchơ̆t hlôi đei iŏk yua mă lei iŏk jang oei adar. Gah iŏk jang kơjăp Tơchơ̆t 57 đơ̆ng Hơnih tơm Chĭnh trĭ gah tơplih kơsô̆, Thủ tướng akhan, đơ̆ng rŏng kơ Jơnŭm pơgơ̆r Trung ương đei pơkăp keh kong gah trong jang păng hơnih juăt jang, rim hơnih jang tơm athei kơchăng pơm jang sơnơng tơlĕch jang. Lơ̆m noh, tơdrong tơm noh Pơkăp tôm tơdrong jang kơ Teh đak gah pơkăp kơsô̆, keh đang chih akŏm kơ sơ yư lĭu kơ teh đak păng kơ sơ yư lĭu kơ tơdrong jang, hơtŏk kơmăi kơmŏk păng tơmam drăm kŏng ngê̆ pơtơm jang.