Lơ̆m 5 sơnăm âu ki, tơdrong jang Kon pơlei pơjei băl choh jang xa, tĕch mơdro rơgei, mât 1 ƀơ̆r đon tơgŭm băl jang pơm pơdrŏng păng tơjur tơnuh hin kơjăp 'lơ̆ng tơ̆ Đắk Lắk hlôi sơng đei hlŏh 1,19 triu unh hnam kon pơlei vang chih măt jang; jô̆ păh lăp 1 sơnăm vă jê̆ 239 rơbâu unh hnam iŏk đei hơnăn jang xa, tĕch mơdro rơgei.

Tơ̆ hop akŏm, dôm bơngai tang măt roi tơbăt dôm tơdrong đei tơ̆ yăn âu mưh atŏk tơiung mŭk drăm đơ̆ng choh jang xa, mă loi jĭ dôm trong jang xa, tơdrong tĕch mơdro rơgei; krao hơvơn kon pơlei chĕng song teh vă pơih xă trong; tơplih ming 'long pơtăm, pơih xă tơring pơtăm sầu riêng lăp hăm tơdrong hơgăt VietGAP tơklep hăm pơjing kơsô̆ tơring pơtăm pơyoa ăn tơdrong tĕch tơ̆ teh đak đe. 'Nâu đei năng jĭ dôm trong jang gơh pơih xă tơ̆ hơnăp ning mônh kơnh.