Tơ̆ jơ sơng, Tổng Bí thư, Kơdră teh đak pơma hơdăh, Việt Nam ling lang năng tơdrong pơvei hăm ASEAN, năng ASEAN jĭ unh hnam tih tôch hơiă, jĭ dôm teh đak jê̆ băl tôch ‘lơ̆ng. Tơchĕng ‘lơ̆ng dôm tơdrong jơnei đơ̆ng ASEAN khei ‘năr âu ki, Tổng Bí thư, Kơdră teh đak tơƀôh đon lui, dôm teh đak lơ̆m Grŭp hơnơ̆ng vei kơjăp tơdrong mât 1 ƀơ̆r đon, tưk tơiung hơnăp jang tơm, pơjing đei Tơpôl ASEAN 2045.

Atŭm hăm ‘nŏh pơma hơdăh, ƀât mă apŭng plenh teh oei đei lơ tơdrong tơplih hrĕnh păng krê hơmơt, dôm teh đak ASEAN athei hơtŏk đon lui băl găh chinh trĭ, hơtŏk đon jang tŏk kơdih, pơih xă tơdrong jang hơdoi mŭk drăm, tĕch mơdro, tơmât jên jang, pơm tơjur ƀiơ̆ tơdrong ưh đei dang ăi băl găh tơdrong jang tŏk đơ̆ng dôm teh đak lơ̆m Grŭp. Bơngai tang măt ăn dôm teh đak ASEAN pơma hơdăh vă hơnơ̆ng jang hơdoi kơjăp hăm Việt Nam, vang tơgop pơjing Tơpôl ASEAN mĭnh ƀơ̆r đon, hơbĕch hơbal, gơ̆h hơgei păng iŏk kon pơlei pơm tơm.