‘Năr 4/8, lơ̆m ‘Măng hop akŏm ưh kơ ê mă Mônh, Quốc hội jăl XVI, ƀơ̆t pơma dơnuh găh Luơ̆t Roi tơbăt, pơtho khôi luơ̆t (hơmet ming), Kơdră Quốc hội Trần Thanh Mẫn pơma hơdăh, tơdrong hơmet ming Luơ̆t ưh khan lăp pơdơh tơ̆ hơmet ming tơdrong hơgăt dăh mă tơmơ̆t thim hơnăp jang ăn rim anih jang, mă athei pơm tơplih ‘lơ̆ng, pơjing tơdrong joăt pơm kiơ̆ khôi luơ̆t lơ̆m tơpôl. Ƀok akhan tơdrong jang roi tơbăt, pơtho khôi luơ̆t khei ‘năr âu ki oei ƀôh vă pơtrŏ đĕch, tam mă pơm lăp hăm ‘meh vă yan âu.

Kơdră Quốc hội athei kăl kơ tơplih đơ̆ng đon tơchĕng “chă tơroi ăn” kơtơ̆ng ang jing đon tơchĕng pơvih pơvăn, tơgŭm kon pơlei hơtŏk ‘lơ̆ng tơdrong kĕ vei lăng kơdih tơdrong pơm tơm, đei yua trŏ luơ̆t đơ̆ng kơdih hăm khôi luơ̆t. Kơdră Quốc hội athei hơgăt hơdăh tơdrong hơgăt jơ bơ̆jang tơgŭm khôi luơ̆t păng roi tơbăt, pơtho khôi luơ̆t athei rim sơnăm hăm khŭl luơ̆t sư, bơngai jang sek tơlang. Hơdai hăm ‘noh, tơchĕng hơlen pơjing tơdrong jang kơmăy kơsô̆ găh roi tơbăt, pơtho khôi luơ̆t, pơtŏ kơsô̆ gơh băt, hlôh vao păng pơm kiơ̆ khôi luơ̆t đơ̆ng kon pơlei lơ̆m kơmăy kơsô̆, tơgop hơnhăk khôi luơ̆t tơpă mơ̆t lơ̆m tơdrong hơrih sa.