Hơnih 'nao hơdah hloh kơ Tơchơ̆t 'noh tơplih kơtang đơ̆ng hơlen lăng hơdrol jing hơlen lăng đơ̆ng rŏng keh đang, atŭm hăm noh pơkăp sơnong jang, asong dơ̆ng mã kơsô̆ tơring pơtăm, mã kơsô̆ anih tah 'nŭng ăn Kơdră Anih jang vei lăng kon pơlei tơ̆ xah. Kiơ̆ kơ noh, tơ-'ngla bơngai pơm jang athei chih hơdah tơdrong kăl băt; jơnŭm pơgơ̆r tơring iŏk vei lăng, thu iŏk, pơdơh dah mă hơmet 'lơ̆ng mã kơsô̆ kiơ̆ tơchơ̆t tơlĕch.

Hăm dôm tơring tơm pơtăm sầu riêng tơ̆ Tây Nguyên, tơchơ̆t 'nao đei lăng tơgŭm pơklaih lơ tơdrong tơnap tap lơ̆m tơđrong chih mã kơsô̆ 'măn tĕch ăn teh đak đe. Khei năr pơm hla bơ-ar đei pơm lơ̆m tŏ sĕt năr. Hăm dôm anih jang, bơngai jang ưh đei chih măt tĕch ăn teh đak đe, khei năr pơm hla bơ-ar tơjur đơ̆ng 14 năr oei pă 3 năr; mưh tĕch ăn dôm tơring athei đei mã kơsô̆, khei năr pơm hla bơ-ar oei pă 10 năr.

Ƀok Vũ Đình Cường, Phŏ Kơdră Hơnih Choh jang xa păng Cham char dêh char Lâm Đồng akhan, Tơchơ̆t kơsô̆ 36 kơ Jơnŭm pơgơ̆r teh đak 'noh trŏ ƀlep hăm tơdrong kăl kơ tơring, mă kăl noh ah tơchơ̆t ưh đei pơgăn tơring pơtăm, pơm trong hiôk ăn teh pơtăm lơ hơdrĕch 'long, lơ̆m noh đei 'long pơtăm đơnơm vă tĕch ăn teh đak đe:

“Đơ̆ng rŏng Tơchơ̆t 36 kơ Jơnŭm pơgơ̆r teh đak đei tơlĕch, dêh char Lâm Đồng hlôi pơgơ̆r hăm rim tơring, rim anih jang akŏm đŏk hơlen dôm tơchơ̆t 'nao vă pơm jang. Tơchơ̆t đei tơlĕch trŏ ƀlep, sek tơlang dôm tơdrong tơhlăk tơhlĭn lơ̆m khei năr ou ki, mă kăl hăm tơring teh pơtăm ưh đei pơgăn să păng teh pơtăm lơ hơdrĕch 'long pơtăm 'măn tĕch ăn teh đak đe”.

Thứ trưởng Anih tơm Choh jang xa păng Cham char Nguyễn Hoàng Hiệp ră hơdah, vă jang tơgŭm kiơ̆ Tơchơ̆t 36 kơ Jơnŭm pơgơ̆r teh đak đei tơmơ̆t jang hrôih, rim tơring athei tĕnh kuăng chih akŏm trong pơm jang, tơgŭm ăn xah pơih lăm pơhrăm, pơkăp tơring pơtăm, anih tah 'nŭng, hơtŏk tơdrong dăr hơlen păng tơroi tơbăt. Chih tơmơ̆t lơ̆m kơmăi kơsô̆ lơ̆m tơdrong asong mã kơsô̆ ưh hơdrô̆ da ƀiơ̆ huach jơ năr ăn bơngai pơm jang, mă oei hơtŏk 'lơ̆ng ăn tơdrong tĕch răt tơmam choh pơtăm đei:

“Rim tơring athei akŏm chă tơroi tơbăt vă pơdrơ̆ng gah tơdrong pơm jang. Tơdrong 'nao lơ̆m 'măng ou noh sơnong jang kơ rim anih jang; sơnong jang kơ bơngai jang, kon pơlei chih măt apinh gơh asong ăn mã kơsô̆ tơring pơtăm adoi hơdah 'lơ̆ng. Asong ăn mã kơsô̆ tơring pơtăm 'măng mă ou 'noh pơm jang tôm tơdrong chih tơroi păng rim unh hnam pơm jang athei pơm kiơ̆ trŏ khôi luơ̆t tơchơ̆t”.

Hăm tơring Tây Nguyên – tơring pơtăm sầu riêng să hloh kơ jơ̆p teh đak, Tơchơ̆t kơsô̆ 36 kơ Jơnŭm pơgơ̆r teh đak đei lăng jĭ trong pơjing jơhngơ̆m pran 'nao vă pơih să tơring pơtăm tơmam drăm 'lơ̆ng, hơtŏk tơdrong tơgar pơm jang, pơjing hơnăn sầu riêng Việt Nam lơ̆m apŭng plenh teh, atŭm hăm 'noh pơih trong hiôk vă hơtŏk tơ-iung kơjăp sơđơ̆ng hloh ăn kon pơlei jang chŭn păng anih jang mŭk drăm.