Pơm lêh tơbăt ou lơ̆m dôm tơdrong jang kơ yuơ Hơnih chĕp pơgơ̆r Sơđơ̆ng mạng teh đak iung jang hơdoi hăm Hơnih tơm Kŏng ang pơgơ̆r hăm hơnăn “Kơ yuơ mĭnh cham char mạng ‘lơ̆ng rŏ ăn rim bơngai.” Iung pơma blŭng a pơm lêh, Thủ tướng Lê Minh Hưng pơma hơdăh teh đak tŏk bŏk mơ̆t lơ̆m chăl atŏk tơ iung kơtang kơ khoa hŏk, kmăi kmŏk, tơplih ‘nao tơchăr păng tơplih kơsô̆, sơkơ̆t hơdăh ‘nou jĭ hơyak kăl hloh vă pơm hơtŏk jang ‘lơ̆ng, kĕ pơjei kơ tơdrong jang mŭk drăm teh đak, tơgop jang kiơ̆ trong tơlĕch jang tŏk mŭk drăm ƀar kơsô̆. Tơdrong tơchơ̆t kơsô̆ 57 kơ Hơnih tơm Chinh trĭ găh atŏk kơtang atŏk tơ iung khoa hŏk, kmăi kmŏk, tơplih ‘nao tơchăr păng tơplih kơsô̆ teh đak hlôi sơkơ̆t hơdăh: Sơđơ̆ng pơm tơm teh đak lơ̆m mạng; sơđơ̆ng ‘lơ̆ng hơ iă mạng, sơđơ̆ng yưh lĭu, sơđơ̆ng kơtơ̆ng ang kơ hơnih jang păng rim bơngai jĭ tơdrong kăl hloh, ưh kơ gơh tơpleh lơ̆m atok tơ iung khoa hŏk, kmăi kmŏk, tơplih ‘nao tơchăr păng tơplih kơsô̆.