Kơdră Quốc hội pơma hơdăh, Việt Nam ling lang năng Mi jĭ 1 lơ̆m dôm teh đak jang hơdoi gĭt kăl hlŏh; tơchĕng 'lơ̆ng dôm hơyak tŏk pran lơ̆m tơdrong Pơvei jang hơdoi gĭt kăl tôm tơdrong đơ̆ng Việt Nam - Mi găh rim tơdrong lơ̆m khei 'năr âu ki. Kơdră Quốc hội athei bơngai tang măt Jennifer Wicks hơtŏk hơnăp jang pơm gơng tơƀưh, vang jang hơdoi hăm Việt Nam tưk pran hlŏh dơ̆ng dôm tơdrong tơƀâp, pơma nuh tơ̆ khul đơ̆ng dôm Anih jang, mă loi jĭ đơ̆ng kơdră chĕp kơ̆l; hơtŏk tơdrong pơjing trong 'lơ̆ng vă pơgơ̆r pơma nuh hơnơ̆ng, đei yoa đơ̆ng anih chih pơjing luơ̆t kơ 2 teh đak.

Drơ̆ng nơ̆r hăm Kơdră Quốc hội Trần Thanh Mẫn, Bơngai tang măt Jennifer Wicks akhan, tơdrong jơnei đơ̆ng tơdrong pơvei kơ 2 teh đak hrei 'nâu đei tơdrong tơgop gĭt kăl đơ̆ng 2 Quốc hội; tơchĕng 'lơ̆ng dôm tơdrong iŏk đei lơ̆m tơdrong jang hơdoi đơ̆ng Quốc hội 2 teh đak khei 'năr âu ki. Bơngai tang măt pơma hơdăh 'mĕh jang hơdoi mă kơjăp hăm dôm anih tơm, anih jang kơpal, tơring tơrang tơ̆ Việt Nam vă hơtŏk loi dơ̆ng tơdrong pơgơ̆r ăn khul grŭp tơƀâp pơma nuh; drơ̆ng nơ̆r găh tơdrong 2 păh 'mĕh pơgơ̆r đang hrôih pơma đam, kĭ pơkăp tơdrong Tơchơ̆t tĕch mơdro hơdai, hơtŏ băl păng ‘lơ̆ng hơiă; pơma hơdăh nơ̆r tơgŭm hơtŏk tơdrong jang hơdoi lơ̆m dôm tơdrong ‘nao, lơ̆m noh găh Mi tôch tơrek truh tơdrong jang hơdoi găh unh hơyuh, khoa hŏk – kơmăy kơmŏk, tơplih hăm kơmăy sô̆; drơ̆ng nơ̆r păng pơma dơ̆ng nơ̆r pơkăp hơtŏk tơdrong jang hơdoi vang hơmet pơ ‘lơ̆ng hiong răm đơ̆ng tơblăh sơ̆./.