Tơ̆ hop akŏm pơma dơnuh hăm hơdruh tơdăm sơnăm 2026 âu ki, Kơdră Anih vei lăng kon pơlei dêh char Gia Lai Phạm Anh Tuấn 'măn tơdrong bơngơ̆t truh dôm nơ̆r apĭnh hơdăh găh pơjing tơdrong jang sa, tơplih ‘nao pơcheh hơgei pơjing tơdrong jang. Hơdruh tơdăm apĭnh hơvơn bơngai jang kơmăi kơmŏk kơtơ̆ng ang, pơjing tơdrong jang tơ̆ tơring, tơgŭm pơjing tơdrong jang sa, hơtŏk tơ iung tơmang lăng păng tơplih kơsô̆ lơ̆m choh jang sa. Kăl kơ lăng truh, mŏ Trần Thị Bé, Kơdră vei lăng Kŏng ti Trần Lâm Gia Phát, apĭnh iŏk yua dôm hơnih bơ̆ jang rơkăh rơkai đơ̆ng rŏng proh hơmet vă pơjing pơgar ơng tơđăh iung jang sa tơplih 'nao pơcheh hơgei.

“Apĭnh dêh char pơjing tơdrong jang pơgar ơng iung jang tơplih pơcheh hơgei. Hrei ‘nâu tơ̆ dôm anih bơ̆jang teh đak tơ̆ dôm hơnih jang rơkăh tôch kơ lơ, ƀơ̆t mă đei dôm anih jang ‘meh pơih pơgar ơng athei năm thue teh. Inh ‘meh vă gơh iŏk yua dôm anih jang thoi noh vă nhôn đei tơdrong hiôk pơih đei dôm pơgar ơng, păng gĭt kăl đei dôm jên mong tơgŭm đơ̆ng rŏng pơjing tơdrong jang vă gơh tơgŭm ăn 1,2 ‘nu buăl mơlôh yak hloh khei ‘năr mơmat tat”.

Đơ̆ng tơdrong tơlĕch âu, Kơdră Anih vei lăng kon pơlei dêh char Phạm Anh Tuấn pơma hơdăh khul kơdră chĕp kơ̆l gô pơjing tơdrong hiôk vă hơdruh tơdăm tơroi păng tơlĕch jang kiơ̆ đon tơchĕng.

“Inh oei tơ̆ âu kơchăng đei hơnih vă đe buăl tơroi đon tơchĕng. Nhôn gô krao trŏ dôm anih jang bơngai đei tơdrong 'mĕh vă. Bơngai đei ƀôh hơiă, bơngai tơgŭm đe buăl hloi. Nhôn kŭm gô đei trong jang tơgŭm ăn kơdih anih jang 'noh vă tơgŭm đe buăl. Dang ei anih mơdro sa hơyơ kŭm 'măn jên tơmam ăn tơdrong tơplih 'nao rơgei bơih. Đe buăl athei hơdrin jang hăm jơhngơ̆m đon pơvih pơvăn, plang pơyơ̆r, jang tơnăp".

Jơhngơ̆m đon khul kơdră chĕp kơ̆l vang yak hơdai kŭm đei tơƀôh hơdăh 'moi kiơ̆ tơdrong chih kơtơ̆ng ang "Kon pơlei, hơnih mơdro sa apĭnh - Khul kơdră chĕp kơ̆l dêh char Gia Lai tơl nơ̆r", pơtơm đơ̆ng khei 8/2026, yua đơ̆ng Hơnih pơvih pơvăn Anih vei lăng kon pơlei dêh char jang hơdai hăm Radiô pơre nơ̆r păng pơdăh Tivi Gia Lai bơ̆jang. Kiơ̆ đơ̆ng noh, kon pơlei, anih mơdro sa gơ̆h pơtruh nơ̆r apĭnh găh trong bơ̆ jang, tơdrong tơgŭm, hơnih tơmơ̆t jên jang păng tơhlăk tơhlĭn lơ̆m pơm hla ar kiơ̆ dôm hơnih sơng iŏk kơ dêh char. Khei 8, tơdrong jang akŏm lơ̆m groi teh, hrŭ ‘mong, iŏk teh păng hơtŏk tơiung mŭk drăm kơdih. Dôm khei đơ̆ng rŏng gô pơih xă truh tơdrong hơmet ming trong pơm hla ar, tơplih hăm kơmăy kơsô̆, choh jang sa hăm kơmăy kơmŏk 'nao, AI, tơdrong hơrih sa tơpôl, jang pơgang păng pơtho pơhrăm. Ƀok Lê Dũng Linh, Kơdră Anih pơvih ăn tơdrong jang kơ teh đak dêh char Gia Lai tơbăt:

“Dôm nơ̆r apĭnh tôm tơdrong gơ̆h sơng iŏk, 'nŏh jĭ ưh đei lơ̆m tơdrong ƀơm truh tơkêng, tơhlâu, 'nŏh đĭ đăng tơdrong pơmat tat, tơhlăk tơhlĭn đơ̆ng kon pơlei, anih tĕch mơdro đei sơng iŏk ngăl. Kon pơlei, anih tĕch mơdro gơih truh, nhôn gô sơng iŏk, pơtruh ăn anih jang kơpal tơl nơ̆r. Anih jang 'nŏh athei kơtă sek tơlang."

Tơ̆ Gia Lai, răp mơ̆ng kon pơlei ưh khan lăp dơ̆ng tơ̆ pơma dơnuh, mă athei đei tơƀôh hăm dôm tơdrong jang hơdăh. Đơ̆ng hơmet pơ ‘lơ̆ng 1 hla ar, hơmet pơ ‘lơ̆ng 1 tơdrong tơhlăk tơhlĭn truh răp hơlen lăng 1 nơ̆r apĭnh truh tôch, ‘noh jĭ trong khŭl kơdră chĕp kơ̆l tơ jê̆ kon pơlei, yak hơdai hăm kon pơlei păng anih mơdro sa. Mưh nơ̆r pơma đơ̆ng yan âu đei tơl ăn hăm bơ̆jang, tơdrong hơtăih đơ̆ng khŭl kơdră chĕp kơ̆l păng kon pơlei Gia Lai gô roi năr roi tơjê̆, pơm dơ̆ng đon lui păng tơdrong ‘lơ̆ng ăn hơtŏk tơiung.