Tơ̆ jơ pơma đam, 2 ‘nu kơdră chĕp kơ̆l pơma nuh păng drơ̆ng nơ̆r găh dôm trong jang tih vă hơnhăk tơdrong pơvei Việt Nam - Australia hơnơ̆ng tŏk pran ‘lơ̆ng hlŏh dơ̆ng tơ̆ hơnăp kơnh, pơm lăp hăm tơdrong ‘mĕh vă jang tŏk tơ̆ rim teh đak kŭm nhen druh kiơ̆ tom dôm tơdrong tơplih tơ̆ tơring păng lơ̆m apŭng plenh teh.

Ƀar ‘nu kơdră chĕp kơ̆l drơ̆ng nơ̆r hơmet kơjăp tơdrong jang chinh trĭ kiơ̆ đơ̆ng hơtŏk tơdrong pơma nuh ăn khul jang tih păng rim khul jang kơpal, pơm pơ 'lơ̆ng hlŏh dơ̆ng tơdrong pơvei găh khul linh, vei sơđơ̆ng teh đak. Đơ̆ng rŏng kơ pơma đam, Tổng Bí thư, Kơdră teh đak Tô Lâm păng Thủ tướng Anthony Albanese vang dơ̆ng lăng lêh kĭ pơkăp, pơjao ăn băl lơ hla ar jang hơdoi găh khoa hŏk - kơmăy kơmŏk, tơplih 'nao rơgei, jang mŭk drăm kơsô̆, pơtho pơhrăm păng dôm tơdrong jang nai hai.