7 khei âu ki, kơsô̆ pơm tơlĕch kơmăy kơmŏk kơ Đắk Lắk tŏk vă jê̆ 14% pơting hăm khei ‘nâu kơ sơnăm hơdrol; lơ̆m noh kơmăy kơmŏk pơm tơlĕch tŏk vă jê̆ 15%, pơm tơlĕch păng pơtruh unh điên tŏk hloh 12%. Vă tơgop iŏk đei tơdrong hơgăt jang tŏk mŭk drăm đơ̆ng 10% tơ̆ kơpal, Đắk Lắk tơlĕch ăn tơdrong hơgăt kơsô̆ pơm tơlĕch kơmăy kơmŏk 5 khei hơtuch sơnăm tŏk vă jê̆ 20%.

Kơdră Anih vei lăng kon pơlei dêh char Đắk Lắk Đỗ Hữu Huy tơbăt, dêh char gô akŏm pơvei pơm tơlĕch dôm hnam kơmăy hiôk, hơmet pơ ‘lơ̆ng hla ar vă ăn dôm tơdrong jang ‘nao mơ̆t bơ̆jang lơ̆m sơnăm ‘nâu, hơdai hăm tŭn pran pơm tơlĕch jrŭ păng sơng iŏk kơmăy kơmŏk ‘nao, kơmăy kơmŏk tơgŭm tơklep hăm logistics.

“Nhôn tŭn pran dôm tơdrong jang ăn dôm tơdrong jang kơmăy kơmŏk ‘nao mơ̆t bơ̆jang hloi lơ̆m sơnăm 2026. Tơplih pran kơtang jing pơm tơlĕch jrŭ, hơtŏk ‘lơ̆ng kơsô̆ kơjă tŏk kŭm nhen pơjing hơnăn găh tơmam đơ̆ng choh jang sa đei; Sơng đei, rơih iŏk dôm tơdrong jang kơmăy kơmŏk ‘nao, kơmăy kơmŏk tơgŭm, đang kơ ‘noh mŭk drăm rơgoh tơklep hăm hơnih hiôk đơ̆ng logistics. Nhôn gô hơnơ̆ng vei sơđơ̆ng unh hơyuh rơgoh kơ dêh char, păng gô pơkăp set hơlen drơ̆ng kiơ̆ trong jang tơmơ̆t jên jang hrôih hloh ăn kơ dôm tơdrong jang ưh kơ đei tơhlăk kiơ truh teh bri”.

Găh unh hơyuh, dêh char Đắk Lắk hlôi drơ̆ng ăn trong jang tơmơ̆t jên jang 19 tơdrong jang hăm akŏm kŏng suơ̆t hloh 1.217 MW; 4 hnam kơmăy ŭnh điên kial, akŏm kŏng suơ̆t 200 MW hlôi tơmơ̆t bơ̆jang. Đắk Lắk apĭnh Anih tơm vei lăng găh Kơmăy kơmŏk, mơdro sa tơgŭm hơtŏk lơ ŭnh hơyuh rơgoh lơ̆m Trong vă jang ŭnh điên VIII hơmet ming, hơtŏk tơiung unh điên kial tơ̆ đak dơsĭ păng tŭn hrĕnh tơmơ̆t jên jang trong tơlĕy pơtruh unh điên.

Phŏ Kơdră Anih tơm vei lăng găh Kơmăy kơmŏk, mơdro sa Trương Thanh Hoài hơlen lăng Đắk Lắk đei tơmam drăm ‘lơ̆ng tih găh unh hơyuh, tơmam đơ̆ng choh jang sa đei mă lei kăl kơ 1 tơdrong jang hơtŏk tơiung ‘nao, jang hơdai tơring păih Pơmơ̆t păng păih Hơlĕch; lơ̆m noh păih Pơmơ̆t hơtŏk tơiung kơmăy kơmŏk pơm tơlĕch, oei păih Hơlĕch gô akŏm kơmăy kơmŏk pơm tơlĕch păng tĕch unh hơyuh.

“Tơring păih Hơlĕch ‘noh jĭ tơdrong tĕch unh điên tôch kơ lơ, mă lei păih Pơmơ̆t ‘noh pơm tơlĕch unh hơyuh tôch kơ lơ. Kơna jô̆ hơlen dơ̆ng pơm liơ tơplih dôm anih jang kơmăy kơmŏk trăp tơ̆ păih Hơlĕch vă tĕch ƀơt 1 păh unh hơyuh pơm tơlĕch unh điên tơ̆ păih Pơmơ̆t. Tơdrong ‘nâu kăl kơ 1 tơdrong jang  1 hơnih hơtŏk tơiung ‘nao. Inh tơchĕng dêh char athei đei roi tơƀôh trong vă jang dơ̆ng lơ̆m jăl jang truh 2030 păng trĕng lăng 2035 -2045.”

Phŏ kơdră tơm kŭm athei Đắk Lắk pơ̆n pơm ƀônh hla ar tơmơ̆t jên jang, mă loi ‘noh jĭ dôm tơdrong jang unh điên; hơdai hăm tŭn hrĕnh dôm tơdrong jang pơtruh unh điên tơm. Anih tơm vei lăng găh Kơmăy kơmŏk mơdro sa gô jang tơgŭm ăn Khŭl kơdră teh đak trong jang tơgŭm tơpôl vang tơgop, tơmơ̆t jên jang kiơ̆ trong BOT hăm trong tơley unh điên vă hơvơn dơ̆ng jên ‘ngoaih kơ jên jang teh đak.