Lơ̆m jơ pơma dơnuh rơhâu, tơpăt păng lui ngeh dih băl, 2 Thủ tướng hlôi lăng ‘lơ̆ng đơ̆ng tơdrong pơvei jang hơdai Việt Nam – Hà Lan lơ̆m khei ‘năr âu ki, pơma dơnuh păng drơ̆ng nơ̆r dôm trong tơlĕch jang vă iŏk jang đei yua tơmam drăm, hơnhăk tơdrong pơvei Jang hơdai tôm tong tŏk ‘lơ̆ng hloh yua kơ tơdrong đei yua kơ 2 teh đak. 2 păh hơnơ̆ng hơtŏk loi dơ̆ng pơma dơnuh đơ̆ng khŭl, mă loi ‘noh jĭ kơdră kơpal, hơtŏk loi dơ̆ng hơmet ming đon lui chĭnh trĭ, yak truh hơtŏk tơdrong pơvei tŏk ‘lơ̆ng ‘nao; hơdai hăm athei hơnơ̆ng jang hơdai, tơgŭm dih băl tơ̆ dôm hop akŏm lơ pang păng apŭng plĕnh teh.

2 Thủ tướng kŭm pơma dơnuh găh dôm tơdrong tơring păng apŭng plĕnh teh vang bơngơ̆t truh, pơma hơdăh tơdrong gĭt kăl đơ̆ng tơdrong vei sơđơ̆ng tơdrong rơngei, sơđơ̆ng tơpôl păng hiôk hian yak vih vơ̆t tơ̆ trong đak dơsĭ, trong gre păr tơ̆ tơring păng lơ̆m apŭng plĕnh teh, kiơ̆ lơ̆m khôi luơ̆t apŭng plĕnh teh gĭt kăl ‘noh jĭ Tơchơ̆t găh Luơ̆t Đak dơsĭ 1982 (UNCLOS). Jơ pơma dơnuh hăm điên thoăi mă blŭng đơ̆ng 2 Thủ tướng Việt Nam păng Hà Lan hlôi jơnei ‘lơ̆ng hơiă, hăm dôm trong vă jang hơdai ‘nao, pơih ăn jăl jang hơtŏk tơiung ƀĕnh tơdrong hơmĕng ăn pơvei Jang hơdai tôm tong Việt Nam – Hà Lan.