Kiơ̆ tơroi chih nơ̆r hơnih jang mŭk drăm, tơhlăk tăk lơ̆m 4 tơdrong jang (groi teh, cham char, tơmam kăp gĭt lơ̆m teh, tơmam ming man) akŏm 5 grŭp tơm đei pơkăp. Noh jing tơdrong klui păng ưh kơ trŏ pơkăp kơjă teh; tơdrong tơklah đơ̆ng sơnong jang jên hu khôi luơ̆t păng tơdrong gơh xa yua teh; Tơdrong răm gah khôi luơ̆t hăm dôm tơchơ̆t hanh chĭnh hlôi đei tơlĕch; Ưh đei tôm tơchơ̆t lơ̆m pơm hla bar cham char păng pơkăp; Tơdrong vei lăng rơm rĕk kiơ̆ pơkăp hŭt lê̆ pơtăl kơ iŏk jang hơlơ̆k.

Pơtôch tơdrong hop akŏm, Phŏ Thủ tướng Hồ Quốc Dũng pơgơ̆r hăm dôm Hơnih jang tơm tơl nơ̆r mă tơpăt dôm nơ̆r pơtruh đơ̆ng hơnih jang mŭk drăm, pơkăp hơdah sơnong jang kơ Trung ương păng tơring. Ră hơdah Jơnŭm pơgơ̆r teh đak dang ei akŏm chih tơchơ̆t păng pơklaih tơnap tap kiơ̆ tơdrong klah asong sơnong pơgơ̆r kơtang ăn tơring, Phŏ Thủ tướng tơrĕk truh dôm tơdrong tơhlăk tăk, tơnap tap, dôm tơchơ̆t lơ̆m khôi luơ̆t oei hơlơ̆k hơle, tơnap gah groi teh păng cham char kăl đei hơlen lăng lơ̆m tơdrong chih hơmet luơ̆t groi teh, luơ̆t cham char, luơ̆t thuê̆ mŭk drăm păng dôm hla bar pơtho pơm jang vă pơm trong hiôk hloh ăn hơnih jang mŭk drăm hơtŏk tơ-iung, tơgop lơ̆m tơdrong hơtŏk atŭm kơ teh đak.