Đăk Lăk dang ei đei hloh 1.200 pơnơ̆ đak, đei 676 dơnou đak, 286 dơnou mong, 244 hơnih ƀôm đak păng 2 pơnơ̆ pĕng găn. Hơdrol kơ khei 'mi kial đak hơbông, Hơnih jang vei lăng kon pơlei dêh char pơgơ̆r hăm rim hơnih jang, rim tơring chă dăr lăng, ƀôh băt rim hơnih pơnơ̆, dơnou mong, mă hăt noh dôm dơnou mong đak hlôi hư răm dah mă ưh đei sơđơ̆ng vă tơtom ming hơmet.

Atŭm hăm noh, rim tơring athei hơlen lăng trong jang vă mong đak lơ̆m dơnou, đak lơ̆m hnam kơmăi unh hơyuh; hơlen lăng kơmăi tơroi tơbăt păng chă trong 'nhăk kon pơlei jăk tơ̆ hơnih sơđơ̆ng mưh đei 'mi tih, đak hơbông dah mă pơchah dơnou mong đak. Hăm dôm dơnou đak tih, khul jang athei kơchăng hơlen lăng măng năr, vă tang găn tơtom mưh 'mi kial đak hơbông truh, vă chă tơroi tơtom păng hơmet ming.