Phường Hoài Nhơn Bắc jĭ tơring ‘lơ̆ng hơiă, gơ̆h hơgei kơ dêh char Gia Lai lơ̆m tơdrong bơ̆ jang đĭ đăng kon pơlei vang vei lăng sơđơ̆ng teh đak hăm lơ trong jang đei yoa ‘lơ̆ng nhen "Roi tơbăt ‘lơ̆ng – Sek tơlang keh, găn pơđĭ tơdrong hơrĕh băl", "Khul drŏ kăn tang găn hơlĕnh pơdăr lơ̆m mang". 6 khei blŭng sơnăm 2026, kon pơlei tơ̆ tơring hlôi roi tơbăt 42 tơdrong gĭt kăl, tơgŭm ăn khul jang kơpal tang găn tơdrong yoch păng sek tơlang lơ tơdrong kơtă tơ̆ tơring hloi. Ƀok Trần Hữu Thảo, Bí thư Đảng, Kơdră Jơnŭm pơgơ̆r kon pơlei phường Hoài Nhơn Bắc, dêh char Gia Lai ăn tơbăt, vei kơjăp tơdrong sơđơ̆ng tơ̆ tơring jĭ hơnăp jang đơ̆ng rim anih jang chinh trĭ, đơ̆ng rim răih kon pơlei.

“Tơdrong sơđơ̆ng ‘lơ̆ng ‘mơ̆i kơna mŭk drăm gơ̆h tŏk, tơdrong arih xa kơ rim unh hnam gơ̆h phĭ tơtŏ dơnŏ ‘lơ̆ng, hiôk chơt. Yoa thoi noh, vei kơjăp tơdrong sơđơ̆ng ưh kơsĭ tơdrong jang đơ̆ng hơdrô̆ khul linh công an đĕch mă ‘nâu jĭ hơnăp jang đơ̆ng đĭ đăng kon pơlei bơ̆n.”

Tơ̆ âu, Đại tướng Trịnh Văn Quyết pôk pơ ư dôm tơdrong jơnei mă Đảng ƀô̆, khul kơdră pơgơ̆r păng kon pơlei phường Hoài Nhơn Bắc, dêh char Gia Lai iŏk đei lơ̆m tơdrong pơjing tơdrong jang đĭ đăng kon pơlei vang vei sơđơ̆ng teh đak. Đại tướng pơma hơdăh, vei sơđơ̆ng  teh đak jĭ tơdrong jang đơ̆ng đĭ đăng kon pơlei hăm tơdrong chĕp kơ̆l pơgơ̆r Đảng, lơ̆m noh khul linh Công an jĭ khul jang tơm. ‘Mĕh vei kơjăp tơdrong sơđơ̆ng đơ̆ng hrôih, đơ̆ng hơtăih ‘nŏh athei vei đơ̆ng tơm, mă "tơm a ‘nŏh jĭ jơhngâm đon kon pơlei". Tơdrong jang đĭ đăng kon pơlei vei sơđơ̆ng teh đak ‘mĕh tŏk pran, đei yoa athei tơklep kơjăp hăm vei lăng ‘lơ̆ng tơdrong arih xa tơpôl, pơm ‘lơ̆ng vă rim bơngai đei xa yoa đơ̆ng tơdrong jang tŏk.

Kơdră chĕp kơ̆l Ban Tuyên giáo Trung ương athei Gia Lai hơnơ̆ng hŏk pơhrăm păng tơlĕch jang đei yoa ‘lơ̆ng dôm tơdrong Tơchơ̆t đơ̆ng Trung ương găh pơjing tơpôl tơpăt ‘lơ̆ng, sơđơ̆ng, gơ̆h hơgei păng trong bơ̆ jang đunh đai vă vei sơđơ̆ng teh đak; tơplih ‘nao tơdrong tơroi tơbăt, hơtŏk kơsư̆k tang găn tơ̆ hơnăp dôm nơ̆r pơma kơnê̆ lơ̆m mang; hơtŏk tơdrong jang hơdoi đơ̆ng Công an, khul linh, Mặt trận Tổ quốc păng rim khul tơpôl; pơjing khul linh công an jê̆ kon pơlei, năng kăl kon pơlei, hlôh vao kon pơlei, yoa kon pơlei mă pơvih pơvăn.

Đại tướng Trịnh Văn Quyết kŭm athei dêh char Gia Lai tơchĕng rơih iŏk phường Hoài Nhơn Bắc pơm tơring pơlong lăng tơdrong jang  "phường xã hội chủ nghĩa":

“Inh athei dêh char Gia Lai tơchĕng hơlen rơih iŏk phường Hoài Nhơn Bắc jĭ 1 lơ̆m dôm tơring pơlong lăng tơdrong jang phường xã hội chủ nghĩa kiơ̆ lơ̆m tơdrong tơchơ̆t khôi luơ̆t, sơđơ̆ng, hơgei, ‘lơ̆ng, hơtŏk tơiung kiơ̆ tơdrong tơchơ̆t kơsô̆ 18. Bơ̆n pơgơ̆r tơlĕch jang dar deh mă lei jang tơpă, jang kơjăp păng đei tơmam hơdăh vă hơnơ̆ng pơih să”.