Tơ̆ Đắk Lắk, adrol kơ pơyan ‘mi tih đak lip sơnăm ‘nâu, 50 unh hnam kon pơlei tơ̆ tơring thŭng tơter đak krong Kỳ Lộ găh dôm xăh Tuy An Bắc păng Đồng Xuân đei tơgŭm man 50 tŏ hnam phao vă veh ver đak lip. 1 pôm hnam xă 20m², tơ̆ hơla hơnă chô̆ hơmet 16 tŏ kơthŭng phi nhuơ̆ vă sư đông; 2 păh đei jrăng bê tông vă gơ̆t hnam huei hoch. Mưh đak tih truh, hnam gô đông kiơ̆ đak, tơgŭm ăn kon pơlei đei anih oei sơđơ̆ng ‘lơ̆ng.

Adrol kơ ‘nŏh, đơ̆ng rŏng kơ ‘mi tih đak lip krưp krĕnh ƀât khei 11 sơnăm sơ̆, hlŏh 600 tŏ hnam gak kơjung đei man đơ̆ng tơdrong jang Quang Trung, tơgŭm ăn hlŏh 600 unh hnam đei anih oei xa sơđơ̆ng ‘lơ̆ng păng gơ̆h veh ver kơ đak lip.

‘Ngoăih kơ ‘nŏh, đơ̆ng jên teh đak păng lơ kơsô̆ jên nai, dêh char Đắk Lắk oei akŏm bơngai, tơmam drăm vă man 100 tŏ hnam veh ver đak lip ăn tơpôl tơ̆ dôm tơring teh thŭng. Mĭnh pôm hnam veh ver kơ đak lip xă dang 220m2, hnam đei man kơjăp ‘lơ̆ng, đei jrăng tang găn glăih tăih, hnam hum, hnam chă pơyơ̆ng ‘you rơgoh păng đei hnam gŏ klĕp ‘lơ̆ng, gơ̆h ăn dang 200 ‘nu bơngai tŏk oei. Dang ei, dôm tŏ hnam âu oei man tơ̆ng mă 2 păng vă jê̆ đang bơih. Tơchĕng adrol lơ̆m khei 9/2026, gô đei tơmât yoa.

Thoi noh, pơyan ‘mi sơnăm ‘nâu, tơdrong veh ver kơ đak lip đơ̆ng kon pơlei tơ̆ dôm tơring teh thŭng kơ dêh char Đắk Lắk gơ̆h kơchăng ƀiơ̆. Ƀok Đào Mỹ, Phŏ Kơdră vei lăng kon pơlei dêh char Đắk Lắk, tơroi: "Nhôn athei Anih vei lăng, dôm anih ming man jăh bơ̆ jang mă hrĕnh, jang đang hrôih hlŏh. Mă lei ưh kơsĭ yoa hrôih mă bơ̆n man ưh kơjăp ôh. Dang ei, nhôn oei hơnơ̆ng hơmet ming Khul pơgơ̆r jang tang găn sar bar đơ̆ng tŏ ‘mi kial kơnê̆ tơ̆ tơring vă gơ̆h tơjră hăm rim tơdrong hơmơt tơ̆ tơring."