Kiơ̆ trong jang proh hơmet jăl jang 2026-2030, trĕng lăng truh sơnăm 2050, Đắk Lắk vă pơjing 3 hơnih jang mŭk drăm ‘noh Hơnih jang Mŭk drăm Nam Phú Yên, Hơnih jang mŭk drăm hơdrô̆ păih Pơmơ̆t păng Hơnih jang mŭk drăm ‘măng jang sơlam Đắk Ruê. Hơdai hăm, dêh char proh hơmet 31 hơnih jang kơmăy kơmŏk hăm teh să hloh 8.900 hek tar. Mă lei, dang ei ‘nao đei 7 hơnih jang kơmăy kơmŏk păng 21 tơring jang kơmăy kơmŏk đei proh hơmet ‘lơ̆ng, tơmơ̆t jên jang ming man; lơ̆m noh lăp 1,2 kơsô̆ tŏ sĕt iŏk đei kơsô̆ jang đei tôm 100%.

Kiơ̆ kơ ƀok Đỗ Bá Phú, Kơdră Anih pơtrŭt tĕch mơdro (Anih tơm vei lăng găh Kơmăy kơmŏk, mơdro sa), vă hơtŏk ‘lơ̆ng đei yua tơmơ̆t jên jang păng hơtŏk tơdrong hơiă đơ̆ng rim hơnih, tơring jang kơmăy kơmŏk, Đắk Lắk kăl hơtŏk tơiung anih jang kăl kiơ̆ trong hrơ̆ch, tơklep kơjăp hăm tơdrong jang logistics hơdai tơring păng dôm unh hơyuh rơgoh. Tơdrong ‘nâu ưh khan lăp tơgŭm tơ jur jên tơmơ̆t jang mă oei hơtŏk ‘lơ̆ng iŏk yua bơ̆jang lơ̆mn đunh đai.

“Dôm hơnih jang kơmăy kơmŏk âu athei tơlĕch lơ̆m trong proh hơmet trong jang logistic 2 tơring, tơgoăt hơdai đei Hơlĕch - Pơmơ̆t, đơ̆ng Tây Nguyên hăm hơnih tơnŏk đak dơsĭ. Vă ‘mơ ‘met unh hơyuh, ‘noh rim hơnih, tơring jang kơmăy kơmŏk đei proh hơmet ‘nao athei đei hơmet ming akŏm, pơm tơdrong hiôk vă hơtŏk tơiung dôm tơdrong jang unh hơyuh rơgoh lơ̆m hơnih, tơring jang kơmăy kơmŏk. Oei tơdăh ưh kơ đei pơjing, tơgoăt akŏm ‘noh jên tơmơ̆t jang gô roi lơ, hoach jên jang teh đak păng pơm kơhret ăn anih jang unh điên”.

Tơpă yan âu ăn ƀôh, tơdrong tơhlăk tih hloh hrei ‘nâu kơ Đắk Lắk ưh khan lăp oei tơ̆ anih jang kăl kơ hơnih jang kơmăy kơmŏk mă oei tơ̆ tơdrong tơgoăt hơdai logistics hăm tơnŏk đak dơsĭ, cham gre păr păng dôm trong jang gre kơdâu nai. Mưh jên logistics oei măk, jơ năr chơ chuĕn pơdui đunh, tơdrong ‘lơ̆ng găh tơring tơmam mơmat tơplih jing tơdrong đei yua pơjei đơ̆ng anih pơm tơlĕch jrŭ.

 Đại tá Nguyễn Thành Sơn, Kơdră Jơnŭm vei lăng Kŏng ti Cảng Cát Lái (pơlei tơm Hồ Chí Minh) akhan, logistics jĭ trong jang tơm kơ mŭk drăm. Lơ̆m noh, Đắk Lắk dang ei oei pơmơ̆ng găh lơ lơ̆m gre chơ chuĕn trong teh; trong đak dơsĭ păng trong gre păr tam mă đei iŏk jang jơnei. Yua thoi noh, dêh char kăl kơ jăh pơjing dôm hơnih logistics ‘nao vă tơ jur jên păng hơtŏk ‘lơ̆ng tơdrong chơ chuĕn tơmam.

“Lăng kiơ̆ dôm ƀai hŏk apŭng plĕnh teh, bơ̆n athei hơnhăk tơmam truh tơ̆ hơnih pơdŭ tơmam tơ̆ kông ‘noh tơdrong chơ chuĕn gô hrĕnh ƀiơ̆. Lơ̆m logistics, hơnih pơdŭ tơmam tơ̆ kông ‘noh jĭ hơnih chơ chuĕn 2 trong, hơnih vei lăng, tah hơmet, chơ chuĕn tơmam hai, jing hơnih pơtrŭt kơjă tŏk hai. Hơnih pơdŭ tơmam tơ̆ kông ‘noh jĭ hơ nih chơ chuĕn tơmam tĕch tơ̆ teh đak đe. Inh ƀôh tơ̆ dêh char  Đắk Lắk, hơnih trŏ lăp hloh ‘noh jĭ tơring xăh Ea Ô, ‘nâu jĭ hơnih hơtăih kơ dêh char Khánh Hòa dang 60km, tôch kơ lăp hăm anih jang logistics.”

Đơ̆ng rŏng tơmơ̆t hơdai, Đắk Lắk đei teh să hloh 18.000 km², dơ̆ng mă 3 lơ̆m teh đak, akŏm pơđĭ tơdrong ‘lơ̆ng tơring tơmam choh jang sa tih tơ̆ păih Pơmơ̆t păng tơnŏk đak dơsĭ, hơnih jang kơmăy kơmŏk, mŭk drăm đak dơsĭ păih Hơlĕch. Tơdrong jang hơdai âu pơih ăn tơdrong hiôk pơjing kơjă kăp gĭt đơ̆ng pơm tơlĕch truh tĕch tơ̆ teh đak đe. Mă lei, vă tơplih tơmam jing tơdrong ‘lơ̆ng jang tŏk, ƀai toan anih jang kơmăy kơmŏk păng logistics kăl kơ đei hơmet pơ ‘lơ̆ng hrơ̆ch.

Kiơ̆ kơ ƀok Đào Mỹ, Phŏ Kơdră Anih vei lăng kon pơlei dêh char Đắk Lắk, dêh char tŏk bŏk akŏm hơmet pơ ‘lơ̆ng hla ar bơ̆jang, jang pơkeh tơdrong jang proh hơmet hơnih, tơring jang kơmăy kơmŏk, tơmơ̆t jên jang hơtŏk tơiung anih jang kăl tơnŏk đak dơsĭ păng logistics vă pơm tơdrong ‘lơ̆ng ăn kơmăy kơmŏk pơm tơlĕch jrŭ păng hơtŏk ‘lơ̆ng kơjă tĕch tơ̆ teh đak đe.

“Anih vei lăng găh Kơmăy kơmŏk, mơdro sa, Anih vei lăng hơnih jang mŭk drăm Phú Yên păng dôm anih jang ƀơm truh akŏm tôm nơ̆r pơma, tơgop đơ̆ng hop akŏm vă roi tơbăt ăn Anih vei lăng kon pơlei dêh char đei pơgơ̆r jang hơdăh. Jang tơgŭm hơnăn dôm tơdrong jang tơm, anih jang kăl tơring jang kơmăy kơmŏk pơm tơlĕch jrŭ păng logistics jăl jang 2026 – 2030 vă kơchăng hơtŏk dôm tơdrong jang sơng đei tơmơ̆t jên jang. Tơlĕch dôm tơdrong jang tơgŭm hơdrô̆ găh teh, asong tŏk iŏk jên, pơtrŭt jang kơmăy kơmŏk, tơgŭm tơplih kơsô̆, bơngai jang tơroi ăn anih jang kơpal kŭm nhen Trung ương set hơlen, tơlĕch ăn trong jang trŏ lăp tơgŭm ăn anih mơdro sa”.

Đei yua ‘lơ̆ng găh tơdrong jang, tơring tơmam păng ‘măng năm lĕch tơ̆ đak dơsĭ lăp tơpă hơtŏk mưh đei tơgoăt hơdai hăm tơdrong jang logistics ‘nao păng anih jang kơmăy kơmŏk hrơ̆ch ‘lơ̆ng. Hăm trong vă jang proh hơmet pơ ‘lơ̆ng, hơtŏk tơiung dôm hơnih jang logistics, tŭn pran pơm tơlĕch jrŭ păng sơng đei dôm bơngai tơmơ̆t jên jang gĭt kăl, Đắk Lắk tŏk bŏk ƀrư̆ ƀrư̆ bơ̆jang kiơ̆ ‘lơ̆ng tơdrong hơgăt jing jang tŏk lơ ‘nao găh kơmăy kơmŏk pơm tơlĕch păng logistics kơ tơring Tây Nguyên - tơ ter đak dơsĭ Nam Trung Bộ.