Pơtôch ‘măng hop akŏm, Phŏ Thủ tướng Lê Tiến Châu pơma hơdăh ‘nâu jĭ trong jang trŏ ƀlep đơ̆ng Anih tơm Chĭnh trĭ, Khŭl kơdră teh đak hlôi mơ̆t jang tơtom păng rim tơring hlôi tơƀôh jơ hngơ̆m đon jang tơnăp. Et hơtŏk hnam trưng ‘năr 5/9 ‘noh jĭ hơnăp jang chĭnh trĭ, ưh kơ dŭn tơ̆ rŏng, dôm Anih tơm, anih jang, tơring ƀơm truh athei pŭ hơnăp jang chĭnh trĭ găh tơdrong jang hrĕnh, ‘lơ̆ng păng sơđơ̆ng tơdrong jang.

Rim tơring athei dăr hơlen pơđĭ tơdrong jang, hơtŏk loi dơ̆ng bơngai jang, hơmet pơ ‘lơ̆ng dôm tơdrong jang kăl nhen hnam bơ̆jang, hnam sŏng sa, hơnih chă pơ yơ̆ng, ŭnh điên, đak, tang găn unh sa pĭt unh sa vă vei sơđơ̆ng tơdrong hiôk sơng hŏk tro.