Iung pơma pơrô̆ tơ̆ jơ bơ̆ jang, Kơdră chĕp pơgơ̆r Kuô̆k hô̆i Trần Thanh Mẫn tơbăt, sơnăm 2024, mă đơ̆ng teh đak oei lơ tơdrong tơnap tap, mă lei tơdrong tŏk GDP oei iŏk đei dang 7%, đĭ đăng 15 trong tơlĕch jang kơ yuơ Kuô̆k hô̆i tơlĕch ăn hlôi jang keh đang, tơdrong hơrih sa tơpôl sơđơ̆ng. Khŭl kơdră chĕp pơgơ̆r Teh đak, Trung ương Mặt trận Tổ quốc Việt Nam  tŏk bŏk kơrŭn jơhngơ̆m jang kiơ̆ tơdrong sut sa hnam pơgia, hnam hnăt hnot; bơ̆ jang vei lăng sơđơ̆ng teh đak đei iung jang kơjăp; bơ̆ jang tơbôl đei atŏk kơtang; bơ̆ jang tang găn sa pơgơ̆m pơjĭp, pơhoach brăh brư đei atŏk kơtang; jơhngơ̆m đon lui yom đơ̆ng kon pơlei hăm Đảng, Teh đak đei tŏk kơtang.

Kơdră chĕp pơgơ̆r Kuô̆k hô̆i pơma hơdăh, iŏk đei jơnei ou ‘noh tơdrong hơdrin đĭ ai đơ̆ng pơ đĭ lơ̆m Đảng, lơ̆m khul ƀô̆ đô̆i kŏng ang, lơ̆m kon pơlei, lơ̆m ou tơgop tôch tih tên kơ Kuô̆k hô̆i pơjing khôi luơ̆t, tơdrong tơchơ̆t rim tơdrong kăl kơ teh đak kiơ̆ trong tơplih ‘nao jơhngơm đon tơchăr păng trong jang pơjing khôi luơ̆t. Tang măt ăn Khul kơdră chĕp pơgơ̆r Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn hôn bơnê dôm tơdrong tơgop đơ̆ng rim hơnih jang kơ Hơnih bơ̆ jang Kuôk hô̆i. Pơma hơdăh, lơ̆m sơnăm 2025 đei lơ hơyak gĭt kăl kơ teh đak, Kơdră chĕp pơgơ̆r Kuô̆k hô̆i athei rim hơnih bơ̆ jang kơ Kuô̆k hô̆i, Hơnih chĕp pơgơ̆r Kuô̆k hô̆i, rim hơnih bơ̆ jang găh Khul kơdră chĕp pơgơ̆r Kuô̆k hô̆i ‘nĕ lăp đon hăm dôm tơdrong jang hlôi iŏk đei mă lei kăl hơdrin hloh dơ̆ng vă hơmet pơ ‘lơ̆ng dôm tơdrong tim mă lăp, tim mă trŏ:“Truh ou kơnh, bơ̆n pơm lơ liơ kĕ hơmet pơ ‘lơ̆ng tơ̆ ‘măng hop akŏm mă 9, ‘măng hop akŏm mă 10 dăh mă ƀơ̆t măt ‘noh ‘măng hop akom hăt hot lơ̆m khei 2/2025 ‘noh găh tơdrong ‘lơ̆ng rim hla bơar chih pơtruh ăn, jang ‘lơ̆ng dăr lăng hơlen. Mă ƀar ‘noh pơtruh hla bơar ăn Khul kơdră tang măt Kuô̆k hô̆i mă tơtom. Mă pêng ‘noh tơdrong ‘lơ̆ng pơchoh trong đơ̆ng Jơnŭm vei lăng kon kông, rim Hơnih bơ̆ jang, Hơnih chĕp pơgơ̆r Kuôk hô̆i kăl ‘lơ̆ng hloh dơ̆ng. Tơdrong mă puăn ‘noh tơdrong tơbrar lơ̆m hơnih jang bơ̆n ‘noh kăl jang kiơ̆kơhret hloh dơ̆ng. Pơm lơ liơ vă hơnih dơ̆ng, tơdrong lui yom kơ Kuô̆k hô̆i kăl atŏk kơtang lơ̆m tơpôl, lơ̆m kon pơlei. Mă kăl ‘noh kon pơlei lui kơ Kuôk hô̆i, Kuôk hô̆i kơ yuơ kon pơlei mă iung jang. ‘Nou jĭ dôm tơdrong mă bơ̆n kăl iung jang kiơ̆ kơtang lơ̆m bơ̆ jang, lơ̆m xek tơlang tơdrong jang”.

Mă kăl jang kiơ̆ Tơdrong tơchơ̆t 18 kơ Trung ương găh hơmet ming khul kơdră chĕp pơgơ̆r kăl iung jang mă ‘lơ̆ng. Ƀlep lơ̆m jơ ‘năr ou, Kơdră chĕp pơgơ̆r Kuô̆k hô̆i ‘meh vă, rim kang ƀô̆, bơngai jang vang kơrŭn jơhngơ̆m, mĭnh nơ̆r ƀơ̆r đon tơgoăt tơgoăl kơjăp vă kĕ yak hloh tơdrong tơnap tap. Kơdră chĕp pơgơ̆r Kuô̆k hô̆i athei, rim Hơnih jang kơ Kuô̆k hô̆i, Hơnih bơ̆ jang kơ Kuô̆k hô̆i, rim hơnih jang găh Hơnih chĕp pơgơ̆r Kuô̆k hô̆i hơnơ̆ng tơplih ‘nao jơhngơ̆m đon pơjing khôi luơ̆t, atok kơtang bơ̆ jang dăr lăng, pơjao jang vă xek tơlang tơdrong jang hơdăh găh hơnăp jang, tơdrong jang, mă hơdăh bơngai jang; adoi dăr lăng hơlen păng hơmet pơ ‘lơ̆ng trong bơ̆ jang kơ Kuô̆k hô̆i. Kơdră chĕp pơgơ̆r Kuô̆k hô̆i pơkă, khei năr kơnh, rim hơnih jang kơ Hơnih bơ̆ jang Kuô̆k hô̆i kăl hơmet ăn ‘lơ̆ng rim tơdrong jang nhen: bơ̆ jang pơtôch sơnăm kơ Kuô̆k hô̆i; rơih 10 tơdrong jang kăl lơ̆m sơnăm 2024; bơ̆ jang vei lăng năng tông Têt ăn khul kang ƀô̆, ŭnh hnam tơnap tap. Mă kăl, Hơnih bơ̆ jang chĕp pơgơ̆rKuô̆k hô̆i pơgơ̆r rim ‘măng hop akom mă 41, 42 lơ̆m khei 1, 2/2025 păng ‘măng hop akom hăt hot lơ̆m khei 2/2025; hơmet ăn ‘măng hop akŏm mă 9, Kuô̆k hô̆i jăl 15; Pơgơ̆r jơnei Hop akŏm Kuô̆k hô̆i găh bơ̆ jang dăr lăng păng Pơm lêh pôk ăn Tơmam hơpăh Diên Hồng ‘măng mă pêng, sơđơ̆ng jơnei, ‘lơ̆ng hơ iă, pơjing đei lang să hloh dơ̆ng.

Hơdrol kơ ‘noh, kiơ̆ đơ̆ng Tổng Thư ký Kuô̆k hô̆i, Kơdră chĕp pơgơ̆r Hơnih bơ̆ jang Kuô̆k hô̆i Lê Quang Tùng, tơdrong tơlĕch pơgơ̆r Hop akŏm pơtôch Tơdrong tơchơ̆t kơsô̆ 18 kơ Khul kơdră chĕp pơgơ̆r Trung ương jăl XII lơ̆m khul Kuô̆k hô̆i, lăp đơ̆ng rŏng đei tơlĕch jang kiơ̆, Đảng khul Kuô̆k hô̆i hlôi chĕp pơgơ̆r, pơrô̆ athei Hơnih bơ̆ jang Kuô̆k hô̆i pơjing Hơnih chĕp pơgơ̆r Hop akŏm Pơtôch Tơdrong tơchơ̆t kơsô̆ 18 tơ̆ Kuô̆k hô̆i kơ yuơ Kơdră chĕp pơgơ̆r Kuô̆k hô̆i pơm Kơdră Hơnih chĕp pơgơ̆r, rim Kơ iĕng kơdră chĕp pơgơ̆r Kuô̆k hô̆i ‘noh Kơ iĕng Kơdră Hơnih chĕp pơgơ̆r. Kơdră chĕp pơgơ̆r Kuô̆k hô̆i hlôi tơlĕch ăn găh tơplih ‘nao, hơmet ming kơ toei khul kơdră chĕp pơgơ̆r pơm hơtŏk bơ̆ jang ‘lơ̆ng, jơnei tơdrong jang kơ rim hơnih bơ̆ jang kơ Kuô̆k hô̆i, rim hơnih jang găh Hơnih chĕp pơgơ̆r Khul kơdră Kuô̆k hô̆i, Hơnih bơ̆ jang Kuô̆k hô̆i; đei nơ̆r pơma gĭt kăl tơ̆ Hop akŏm lơ̆m teh đak tơlĕch jang kiơ̆ hơlen pơtôch jang kiơ̆ Tơdrong tơchơ̆t 18 găh trong jang “Trong iung jang hơmet pơ ‘lơ̆ng dôm tơdrong tơhlăk tơhlĭn găh tơdrong tơchơ̆t, pơkăp”.