Tơ̆ jơ tơƀơ̆p, rim bơngai tang măt ‘noh Ƀô̆ đô̆i nuih mơng, ƀô̆ đô̆i so, hơdruh tơdăm năm iung jang sơ̆ hlôi tơbăt dih băl dôm tơdrong blŏk hơdơ̆r găh ‘măng iung tơblăh nuih mơng, tơbăt hơdăh jơhngơ̆m đon ưh kơ hli lôch hơrih, mĭnh nơ̆r ƀơ̆r đon hăm tơdrong jang kĕch mang kơ Đảng, kơ hơdrĕch hơdrung. Rim bơngai tang măt jei pơma tơbăt jơhngơ̆m đon lui yom păng ‘meh vă hơnơ̆ng tơgop jơhngơ̆m đon ăn tơdrong jang tơ iung pơjing, vei lăng Teh đak lơ̆m chăl atŏk tơ iung ‘nao. Iung pơma tơ̆ jơ tơƀơ̆p muh măt, Tổng Bí thư Tô Lâm sơkơ̆t hơdăh, chăl sơnăm kĕch mang Việt Nam ling lang chih răk tơƀăk vei tơdrong tơgop tih tên đơ̆ng rim bơngai hlôi vang iung tơblăh tơ̆ lơ kơdrăn tơblăh. Tổng Bí thư tơroi tơbăt ăn rim bơngai tang măt găh rim trong bơ̆ jang tih tên gô đei tơlĕch jang lơ̆m khei năr kơnh, akŏm lơ̆m pêng tơdrong jang tơm ‘noh: Vei kơjăp tơdrong rơngei hiôk hian, sơđơ̆ng; atŏk tơ iung muk drăm-tơpôl tĕnh koăng, kơjăp ‘lơ̆ng; pơm hơtŏk hơrih sa hiôk chơt ăn kon pơlei, mă kăl ‘noh bơngai dơnuh, bơngai drŏ kăn, đe hơ ioh, sơđơ̆ng ăn ưh kơ lê̆ bơngai bu hơchăng hŭt tơ̆ rŏng.