A Riêu Âr Pục oh mbuan sa janih ieu lac sa adat harei roya di urang Pa Cô blaoh nyu daok ieu lac sa adat hukum hu peih ngak meng angan je di dom urang taha akaok palei, mai meng dom sarak brei thau dahlau hu mbang tame dalam rai diuk di bhap bani. Tui hatai saneng di urang Pa Cô, dom bruk ngak pambuak pagam tal bruk yut yau, blah mariak gauk ka taneh riya, sang danaok atau dom cuang kanda dui atah di dom baoh sang meyah oh ta-eng drei langyah ye meda hu ba tabiak anak nyaom urang taha akaok palei. Tuk nan, adat roya A Riêu Âr Pục hu peih ngak yau sa mbang ba pataom prong di bhap bani. Taha akaok palei Lê Tuấn Mõ, palei Kê Ré, xã A Lưới 3 brei thau:

“Adat roya Âr Pục mbang ini langyah dom kadha cuang kandah pambuak pagam tal rai diuk di mikva, njauk ndom mayai di nyu lac langyah oh lac bruk yut yau blaoh daok langyah dom bruk merak gauk ka taneh riya, merak gauk ka sang danaok…. Dom cuang kandah blaoh dom baoh sang oh langyah hu ye hu daa taha akaok palei dalam palei saong daa taong abih dom palei karei piah gam gauk ginum biai saong yasa haong gauk piah langyah brei ba pataom gauk dom bruk bo rah tabiak dalam dom urang daok meriak gauk”.

Adat roya rah tabiak rilo bruk ngak adat biak tani tanat. Meng bruk kuhria caga ndap nda, daa nyaom urang taha akaok palei tal dom binah javap jaleiy, langyah saong ginum biai nao mai. Dom urang hu mbaok tame hu brei thau ka hatai saneng di drei meng dom panuac ndom biak biai min hu njauk chung di nyu lý lẽ, gaok tuk mai hu ndung bak jalan daoh dai di dom ragam daoh bhap bani bhian randap. Hadei di tuk pang ginup abih panuac khan brei thau, nyaom pataom urang taha akaok palei gam gauk ba tabiak panuac langyah puac di abih.

Kadha njauk pok meyaom dalam nan hu lac jalan di A Riêu Âr Pục oh lac piah taong phat blaoh nyu brei pamong tal bruk langyah ba paataom. Dalam yaok panuac langyah, tacei pato di dom urang taha akaok palei tuk halei jeng bak ilamu adat ka jalan diuk rai iek prong bruk anit ranam gauk, daok dang ka siam gheih haong gauk saong hu that trak haong bruk ngak di bhap bani bangsa. Kayua lac, kadha blaoh urang Pa Cô caong khin nan lac khik ramik hatai gul pataom dalam puk palei. Harei ini, gam haong bruk kham merat pacang khik ilamo meng kan, adat roya A Riêu Âr Pục hu padang ngak gilac saong yaih khan prong tabiak tal bhap bani atah jaik.  

Urang gheih tangin Hồ Thị Tư brei thau, bruk padang ngak angaok sân khấu adat roya oh lac piah khik ramik inem krung ilamo di bangsa Pa Cô bo daok dong ka tuai damuai saong rai rah dam dara thau cambaih jang ka dom yaom daok hu khik ramik tapa rilo rai rah.

“Bruk padang ngak angaok sân khấu adat roya Âr Pục di bangsa Pa Cô piah yaih khan dom janih siam gheih dalam ilamo bangsa ndung bak adat hukum meng kan dahlau brei ka dom tuai damuai meng atah jeng yau dom ayut ranaih  di palei oh ka thau tal ye hadei di mong mboh hu ye meda taduan mek hu saong thau cambaih yaom lingai di adat roya ini”.

Dahlau diah, hadei di bruk merak gauk hu langyah ba pataom blaoh blai, urang Pa Cô peih ngak adat sik kubao piah ba-yar dhar phol ka yang bhang saong taong inem ka bruk ngak hu jak jeng siam mekre di tukvak langyah ba pataom. Harei ini, peih ngak jalan diuk rai ilamu, adat cambat ini oh daok hu peih ngak. Salih tame nan lac dom ragam tamia, sap chiêng, sap gar saong dom ragam daoh bhap bani yava tagok dalam kadha bui sambai gul pataom di bhap bani. Yaom lac rai diuk harei ini hu rilo salih bhrau, min dom yaom lingai hu jeng asal di A Riêu Âr Pục jeng daok hu urang Pa Cô khik ramik yau sa binah pahadar ilamo di bangsa drei../.