Dom harei puac adit, meng subuh page iem mek Bimong Darang hu biak rilo rahra saong tuai damuai. Urang nao tabak takai pasram padhih, urang cuh galau Nyang, rivang jirah iek atau dang di angaok tabung ceik maong iek kraong Đà Rằng saong ban Tuy Hòa meng angaok glaong trun. Di labik laneing lanoi, haluo mat saong gandi gandang, baoh bimong mbuan chreih takre ngan haong sambo bar kiak bhong bariyueng di thaik thaot bimong kalan Champa.

Hu padang di puac abap XI, akaok abap XII, Bimong Nhạn ieu lac sa di dalam dom danak dak thaik thaot bimong Cham jaik yau daok tamo di bhum Kreh Negar. Ini lac sa di dalam dom bimong daok khik bruk duh paling Amaik Po Ina Nagar. Yaok thun, dalam 10 harei kreh bilan 3 saka ia bulan, adat Yon yang Amuk hu peih ngak di Bimong Nhạn, dui pachreih rilo rahra saong tuai damuai hu mbaok tame. Tui urang Roh duah sajarah ilamo Nguyễn Danh Hạnh, daok di Phuong Tuy Hòa, tinh Dak Lak, ini lac danak dak duh paling bhap bini dalam nan hu bhap bini Yuen, Cam saong Lo di bhum Kreh Negar.

“Inem mek Bimong Nhạn duh amuk Po Ine Negar, hadei ini urang Yuen ieu amuk lac Po Thiên Y A Na. Amuk Thiên Y A Na lac sa dalam dom po yang hu maong yau lac yang khik taneh riya di bhum, khil iek taong abih taneh riya kraong tasik di ini/ Adat Vía Amuk di labaih bilan 3 saka ia bulan, adat ini hu meng lavik rai nan jeng hu kadha “Thei mai Bimong Nhạn Tuy Hòa/ Bo maong ragam tamia paling ka Amuk daok di ini”.

Bimong Nhạn glaong jaik 24 met, hu ramik dak Inem mek pakat negar biak karei. Oh lac sa janih ndung dalam nan yaom kaom sajarah saong thaik thaot bimong kalan, labik ini daok pagam haong raidiuk ilamo, adat cambat di rahra bhum palei tapa rilo rairah. Labik mblang sanak ginreih gam haong labik kreh dalam ban medin tapen tasik brei ka Bimong Nhạn pachreih mekre karei ka rilo tuai damuai. Sa-ai kamei Tống Thị Hải Yến, tuai damuai mai meng Phú Thọ brei thau:

“Tagok mai tal ini dahlak hulin mboh biak laneing lanoi. Labik ginreih yau ini, kreh di ban medin jeng lac biak rilo rahra hadah krah bahrau, min tapi jeng sa hagait nan biak ginreih ngak ka anek menuac biak laneing lanoi dalam hatai. Mbang akaok meti drei sa danak dak blaoh daok meng abap 11 tal urak ini bo jeng daok gheih, jaik yau daok tamo yau ini ye drei mboh lac bruk khik ramik, pasiam di karja biak siam”.

Di jalan patagok jirah rivang di tinh Dak Lak hadei pagam, labik gah Pur hu kein lagaih tasik, drap ar ilamo saong thaik thaot hu dahlau brei mboh lac labik patagok jirah rivang hu makna. Dalam nan, Bimong Nhạn hu maong yau lac bruk naih gheih pambuak di jirah rivang ilamo, jirah rivang yang mebang aguma saong bad rei tame thaik thaot ban medin tapen tasik. Amuk Trần Thị Bử, Phaok Yam ndok dang bruk di Mbang Pasang iek inem mek,, So Ilamo, Pahat padhih saong Jirah rivang Dak Lak brei thau:

“Hadei di tuk taduan inem mek Bimong Nhạn ye Mbang pasang iek inem mek brei pasiam gilac talei paga ơacang anak Bimong piah khik kajap salamat ka tuaoi damuai mai tal jirah rivang saong duh paling di inem mek. Mbang pasang iek inem mek jeng hu jalan ngak danak dak lac harei raya Yon yang Amuk yaok thun piah duh ka dom kapul tuai damuai saong dom ta-eng menuac urang hu hatai caong mai talc uh gilau nyang adat vía Amuk di Bimong Nhạn piah dui pachreih tuai damuai jirah rivang mai tal ini”

Ieu Lac sa janih danak dak ribau thun ndung bak inem mek saong thaik thaot ilamu bimong kalan di ilamo Champa yao klak, Bimong Nhạn harei ini jeng daok dang di kreh ban medin bahrau, ndung bak dalam nan dom gheih ghang la-i la-an gandi gandang saong ginreih. Labik ini jeng labik mai tal gheih karei, dui pachreih tuai damuai dalam luac jalan jirah rivang di gah Pur ia harei tagok tinh Dak Lak./.